Tərtər Rayon Polis Şöbəsi və rayon prokurorluğunun əməkdaşları tərəfindən həyata keçirilən istintaq-əməliyyat tədbirləri nəticəsində rayon ərazisində ölümlə nəticələnən yol nəqliyyat hadisəsini törədərək hadisə yerindən qaçan sürücü həbs edilib.

Axar.az xəbər verir ki, 90 PD 279 dövlət qeydiyyat nişanlı "Mersedes" markalı avtomobilin sürücüsü, Tərtər rayonunun Sarıcallı kənd sakini, 1979-cu il təvəllüdlü Elçin Abdullayev tutularaq istintaqa təhvil verilib.

Xatırladaq ki, avqustun 27-də saat 23:00 radələrində rayonun E.Səfərov küçəsində sözügedən sürücü yol hərəkəti və nəqliyyat vasitələrinin istismarı qaydalarını kobud surətdə pozaraq idarə etdiyi "Mersedes" markalı avtomobillə yolu keçən piyada 1928-ci il təvəllüdlü Fərman İbrahimovu vuraraq hadisə yerindən qaçmışdı.

Zərərçəkən aldığı xəsarətlərdən xəstəxanada vəfat etmişdi.

Qeyd edək ki, faktla bağlı Cinayət Məcəlləsinin 263.2 və 264-cü maddələri ilə cinayət işi açılmışdı.

E.Abdullayev iş üzrə təqsirləndirilən şəxs qismində cəlb olunaraq ona Cinayət Məcəlləsinin qeyd edilən maddələrində nəzərdə tutulan ittiham elan olunub və məhkəmənin qərarı ilə barəsində həbs qətimkan tədbiri seçilib.

Hazırda iş üzrə zəruri istintaq tədbirləri davam etdirilir.