Azərbaycan-Belçika Dostluq Cəmiyyətinin sədri Ayxan Dəmirçi və Belçika Gənc Türk Ocaqlarının keçmiş dönəm başkanı Rəcəb Tuncər Sarının şəxsi təşəbbüsü ilə Pirşağı qəsəbəsi ərazisində məskunlaşmış Xocalı 2 saylı tam orta məktəbinə yeni dərs ilinin başlanması münasibətilə məktəb ləvazimatlarından ibarət hədiyyə göndərilib.

Cəmiyyətdən Axar.az-a verilən məlumata görə, əsasən məktəbli geyim formaları, çantalar, məktəb ləvazimatları, məktəb üçün bilgisayar, səsgücləndirici meqafon, dəftər-qələm və s.-dən ibarət olan hədiyyələr məktəbə Azərbaycanda tərəfdaş təşkilat olan Azərbaycanlıların və digər Türkdilli Xalqların Əməkdaşlıq Mərkəzi tərəfindən təqdim olunub.

ATXƏM-in icra katibi İlqar İlkin mərasimdə çıxış edərək, bildirib ki, Belçikada fəaliyyət göstərən Türkiyə və Azərbaycan diaspor təşkilatları mütəmadi şəkildə Avropada Xocalı soyqırımının tanıdılması ilə bağlı çalışırlar:

"Hər il Avropa Parlamenti önündə Xocalı mitinqləri, Xocalıya həsr olunmuş tədbirlər məhz Ayxan Dəmirçi və Tuncay Sarının böyük zəhməti və təşəbbüskarlıqları hesabına baş tutur. Cari ildə onlar Azərbaycanda olarkən Xocalı məktəblərinə də baş çəkib, məktəbə yardım edəcəklərinə söz vermişdilər. Onlar öz vədlərinə əməl etdilər və biz bu gün onlarla Xocalı məktəblilərinin sevincinə şahid oluruq, onların gözlərindəki minnətdarlıq duyğusunu görürük".

Dağlıq Qarabağ Azərbaycan İcmasının üzvü, Xocalı sakini Cavid Əliyev Ayxan Dəmirçi və Tuncay Sarıya Xocalılar adından öz minnətdarlığını bildirib. Xocalı şəhər 2 saylı tam orta məktəbinin direktoru Fiqurə Rüstəmova da göstərilən bu dəstəyə görə bütün Belçika türklərinə təşəkkür edib, bu gözəl təşəbbüsə təhsildə əldə edəcəkləri yüksək nailiyyətlərlə cavab verəcəklərini bildirib.