Xəbər verdiyimiz kimi, Prezident İlham Əliyevin sərəncamı ilə "Tibbi Ərazi Bölmələrini İdarəetmə Birliyi" publik hüquqi şəxsin (TƏBİB) Müşahidə Şurasının tərkibi təsdiqlənib.

Axar.az xəbər verir ki, sərəncama əsasən, Azərbaycan Prezidentinin sosial-iqtisadi məsələlər üzrə köməkçisi Xalid Nurəddin oğlu Əhədov Müşahidə Şurasının sədri təyin olunub.

Qeyd edək ki, X.Əhədov 4 fevral 1980-ci ildə anadan olub. X.Əhədovun atası Nurəddin Əhədov həm də keçmiş millət vəkili, istiqlalçı deputatdır.

Xaliq Əhədov 1996-2002-ci illərdə Azərbaycan Dövlət İqtisad Universitetində maliyyə və kredit ixtisası üzrə bakalavr və magistr dərəcəsi alıb. 2010-2012-ci illərdə “Instituto de Empresa” (IE) biznes məktəbinə qəbul olunub və Barselonada MBA təhsili alıb.

X.Əhədov 1999-cu ilin martında “Bank of Baku”da pərakəndə biznes bölməsinin meneceri, müştəri məmnuniyyəti departamentinin rəhbəri vəzifələrində çalışıb.

Ardınca - 2005-ci ildə “Bank of Baku”nun idarə heyəti sədrinin müavini işləyib.

2012-ci ildə “Unibank”da icraedici komitənin üzvü, 2015-ci ildə “Unibank”ın icraçı direktoru vəzifəsini tutub. 2016-da “Bank Standard”ın baş direktoru, daha sonra (yenə 2016) "Azər Türk Bank"da İdarə Heyətinin sədri vəzifəsinin müvəqqəti icraedicisi olub.

Xaliq Əhədov 10.01.2017-ci il tarixində "Beynəlxalq Bank"ın İdarə Heyətinə sədr gətirilib. 14.03.2018-ci il tarixində "Beynəlxalq Bankı"n səhmdarlarının ümumi yığıncağında bu postdan ayrılaraq, bankın Müşahidə Şurasının üzvü təyin edilib.

Daha sonra Azərbaycan Respublikasının Birinci vitse-prezidentinin köməkçisi vəzifəsində çalışıb.

2022-ci il 17 noyabrda Prezidentin sosial‑iqtisadi məsələlər üzrə köməkçisi təyin edilib.