Paytaxtda fəaliyyət göstərən şadlıq evlərindən şikayətlər səngimir.

Axar.az xəbər verir ki, toy sahibləri restoran rəhbərliyinin toydan sonra stolun üzərində qalan yemək və içkiləri aparmağa icazə vermədiklərini deyir.

Restoran rəhbərləri isə səslənən iddiaların əsassız olduğunu bildirir. Bəy və gəlinin ailəsinə toy bitdikdən sonra 7 nəfərlik yemək təqdim etdiklərini, qane olmadıqları təqdirdə isə stoldakıları da aparmağı təklif etdiklərini söyləyirlər.

Maraqlısı budur ki, restoran sahibləri qonaq gəlmədikdə belə, onlar üçün nəzərdə tutulmuş masanın pulunu tələb edirlər. Belə çıxır ki, müştəri bütün qonaqlar üçün verilən qidanın pulunu ödəmiş hesab olunur. Məntiqlə həmin qidaları özü ilə aparmağa da ixtiyarı çatır.

Antiintisar Siyasəti və İstehlakçıları Hüquqlarının Müdafiəsi Dövlət Xidmətindən Xəzər xəbər-ə verilən məlumata görə, toy sahibi ilə restoran rəhəbərliyi arasında müqavilə imzalanmalı və bu məsələ orada öz əksini tapmalıdır. Bu cür problemlərin əsas səbəbi də məhz ortada hüquqi bir sənədin olmamasıdır.