Bakının Xəzər rayonunda ağır yol qəzası baş verib.

Axar.az xəbər verir ki, Bakı şəhər sakini Kamal Nəzərov Qala yolunda idarə etdiyi "Renault" markalı maşınla yolu keçən piyada, 1958-ci il təvəllüdlü Mübadə Məmmədovanı vurub. Piyada hadisə yerindəcə keçinib.

K. Nəzərov daha sonra idarəetməni itirərək avtomobili qarşıdan gələn "İveco" markalı avtobusa çırpıb. Nəticədə "Renault"da olan sərnişin, 1971-ci il təvəllüdlü Şəfayət Cəfərov aldığı xəsarətdən dünyasını dəyişib.

Fövqəladə Hallar Nazirliyinin xilasetmə qüvvələri deformasiyaya uğramış minik avtomobilində sıxılmış vəziyyətdə qalmış sərnişinin meyitini çıxararaq aidiyyəti üzrə təhvil veriblər. Əməliyyat saat 23:31-də başa çatıb.

K. Nəzərov özü xəstəxanaya yerləşdirilib, vəziyyəti ağırdır.

APA-nın məlumatına görə, faktla bağlı Xəzər Rayon Polis İdarəsinin istintaq bölməsində Cinayət Məcəlləsinin 263.3-cü (yol hərəkəti qaydalarını pozma – ehtiyatsızlıqdan iki və daha çox şəxsin ölümünə səbəb olduqda) maddəsi ilə cinayət işi başlanıb, istintaq gedir.