Qənirə Paşayeva Milli Məclisdə I qrup əlillərin ödənişli ali təhsildən azad edilməsini təklif edib.

Axar.az xəbər verir ki, MM-də çıxş edən millət vəkili həmkarı Məlahət İbrahimqızının təklifini dəstəkləyərək I qrup əlillərin ödənişli ali təhsildən azad edilməsi, onların təhsil haqqının dövlət vəsaiti hesabına ödənilməsi təklifi ilə çıxış edib:

"Bu insanların sayı o qədər də çox deyil. Onlar ali məktəblərə ödənişli əsaslarla daxil olarsa, çox yaxşı olar ki, onların təhsil haqqı dövlət tərəfindən ödənilsin. Çünki bu vəsaiti ödəmək onlar üçün çox çətindir. Bir neçə gün əvvəl bir neçə görmə qabiliyyəti olmayan, ali məktəblərdə oxuyan I qrup əlil gənclərimizlə görüşdük. Təhsil haqqını ödəməkdə çətinlik çəkirlər və çox ağır vəziyyətdə qalıblar. Ona görə də bu məsələyə aydınlıq gətirilməli, universitetlərdə onların təhsil haqlarından azad edilməsi məsələsinə mütləq baxılmalı və məsələ öz həllini tapmalıdır. Bu, sağlamlıq imkanları məhdud insanlarımızın təhsilə stimullaşdırılması istiqamətində çox gözəl bir addım olardı".