2026.08.07. 14:02

Gəncə şəhəri Şah İsmayıl Xətai prospektində yerləşən, 20 Yanvar şəhidlərinin xatirəsinə həsr olunmuş abidə baxımsız vəziyyətdədir.

Sosial şəbəkədə yayılan videoda ərazidə uzun müddətdir təmizlik və abadlıq işləri aparılmadığı, ətrafda antisanitar vəziyyət yarandığı, yaşıllıq sahələrinin məhv olduğu görünür.

Həmçinin qaz kəsildiyi üçün abidənin önündəki əbədi məşəl sönüb, bulaqlara isə su gəlmir.

Məsələ ilə əlaqədar Axar.az-a açıqlamasında Gəncə Şəhər İcra Hakimiyyətinin ictimai-siyasi və humanitar məsələlər üzrə baş məsləhətçisi Gülnar Rzayeva bildirib ki, abidənin ərazisi artıq təmizlənib.

“Ərazidəki əbədi məşəlin qaz təchizatının bərpası ilə bağlı qaz idarəsi ilə danışılıb. Qaz təchizatı bərpa olunacaq. Həmçinin ərazidəki bulaqla bağlı su idarəsinə də müraciət edilib və hazırda idarədən cavab gözləyirik. Cavab alındıqdan sonra bulaqla bağlı su işləri də bərpa olunacaq”, - o qeyd edib.