Azərbaycan Hökumətinin həyata keçirdiyi repatriasiya tədbirləri çərçivəsində Suriya Ərəb Respublikasından ölkəmizə gətirilən daha 13 vətəndaşımız (6 qadın, 7 uşaq) Sosial Xidmətlər Agentliyinin müvafiq sosial xidmət müəssisəsinə yerləşdirilib.

Axar.az xəbər verir ki, müəssisədə onların ilkin tibbi müayinəsi aparılıb, eyni zamanda sosial və psixoloji vəziyyətlərinin qiymətləndirilməsi məqsədilə zəruri dəstək tədbirləri göstərilib.

Hazırda repatriantların sosial reabilitasiyası istiqamətində işlər davam etdirilir. Reabilitasiya mərhələsi yekunlaşdıqdan sonra vətəndaşlar evlərinə yola salınacaqlar.

Bundan sonrakı mərhələdə Agentliyin sosial işçiləri və psixoloqları onların evlərinə baş çəkərək fərdi vəziyyətlərini qiymətləndirəcək və ehtiyaclarına uyğun sosial dəstək tədbirləri müəyyənləşdirəcəklər.

Qeyd edək ki, son illər ərzində ölkəmizə repatriasiya olunmuş 630-dan çox şəxs Sosial Xidmətlər Agentliyinin sosial reabilitasiya xidmətlərindən yararlanıb. Hazırda isə 85 repatriantla bağlı sosial reabilitasiya tədbirləri davam etdirilir.