Bir neçə gün əvvəl Şəkidə yanmış cəsədi tapılan 61 yaşlı Valya İsmayılovanın ölümü ilə bağlı aparılan araşdırmalar zamanı maraqlı faktlar ortaya çıxıb.

ANS-in məlumatına görə, Hadisə yerinə gələn prokurorluq əməkdaşları isə ilkin versiya kimi Valya İsmayılovanın ölümündə yanğın hadisəsi və özünə qəsd ehtimalını irəli sürmüşdü.

Rayonda uzun illər falçılıqla məşğul olan mərhumun evindən dini ritualların icrası zamanı istifadə olunan çoxlu sayda əşyalar tapılıb. Aşkarlananlar arasında ayı, qaban, canavar və s. vəhşi heyvan dişləri olub.

Rayon prokurorluğunun müstəntiqi Mübariz Orucovun sözlərinə görə, evdən cadugarlıqla bağlı kitablar, eyni zamanda cadugarlığın həyata keçirilməsində istifadə olunan avadanlıqlar aşkarlanıb.

Qonşular da hər gün Valya İsmayılovanın saatlarla evində şam yandırmaqla müxtəlif dini ayinlər icra etdiyinin şahidi olub. Müstəntiqin ehtimalına görə, onun ölümünə də elə bu şamlardan yaranan yanğın səbəb olub.

"Müəyyən edilib ki, Valya İsmayılova saat 23:24 radələrindən başlayaraq müxtəlif dini ritualların, dini ayinlərin icrası məqsədilə müxtəlif şamlar yandırıb və dini ayinlər 3-4 saat müddətində davam edib".

Hazırda 61 yaşlı qadının ölümünə məhz məşğul olduğu peşənin səbəb olması və digər versiyalar da nəzərdən keçirilir.