Ofisdən ayrılmağımıza səbəb ofis sahiblərinin öz planlarınlarında dəyişiklik etməsidir.

Bu sözləri Axar.az-a açıqlamasında Demokratik İslahatlar Partiyasının dəbdəbəli villadan çıxması barədə məlumatlara aydınlıq gətirən millət vəkili Asim Mollazadə deyib. Deputat yaxın müddətdə yeni ofisə köçəcəklərini bildirib.

Millət vəkili partiya işçilərinin maaşlarının kəsilməsi ilə bağlı məsələyə də aydınlıq gətirib:

“Bizim partiyada çalışanların əksəriyyəti könüllülərdir. Ancaq partiyada kimlər ki maaş alır, onlar bundan sonra da əmək haqlarını almaqda davam edəcəklər. Maliyyə çətinliyi ilə bağlı maaşların verilmədiyi barədə xəbər doğru deyil”.

Qeyd edək ki, BakiPost.az saytı Azərbaycan Demokratik İslahatlar Partiyasının sədri, millət vəkili Asim Mollazadənin maliyyə çətinlikləri ilə üzləşməsi və bu səbəbdən Nəsimi rayonu, Sabit Rəhman küçəsi 7 ünvanında yerləşən ofisdən çıxmaq məcburiyyətində qaldığı barədə xəbər yayıb.