İdmançı Kamil Zeynallı və jurnalist Əfruzə Ağayeva arasında baş verən məhkəmə başa çatıb.

Bu barədə Axar.az-a məlumat verən hüquqşünas Vüqar Səfərli qeyd edib ki, Xətai rayon məhkəməsində hakim Namidar Misirzadənin sədrliyi ilə keçirilən prosesdə “Big.az” saytının baş redaktoru Ağayeva Əfruzə Məmmədhənifə qızının Zeynallı Kamil Heybət oğluna qarşı şərəf və ləyaqətin, isgüzar nüfuzun müdafiəsi və dəymiş mənəvi zərərin əvəzinin ödənilməsi tələbi qismən təmin edilib. Məhkəmə Zeynallı Kamilin Ağayeva Əfruzənin ünvanına özünün şəxsi İnstaqram səhifəsində, xəbər saytlarında küçə söyüşlərinə görə qarşı tərəfdən müvafiq olaraq İnstaqramda və xəbər saytlarında üzr istəməsi və həmin təhqiramiz ifadələrə görə təkzib verməsi barədə qərar qəbul olunub. Ağayeva Əfruzənin iddia tələbinin qalan hissəsi, yəni mənəvi zərərə görə 50 min manat iddiası isə rədd edilib. Həmçinin qarşılıqlı iddia üzrə Zeynallı Kamilin iddiası - “Big.az” saytında aparıcı Şəbnəm Hüseynovanın “Kamilin mənə söydüyü söyüşlər onun nəslindəki xanımlara getsin” başlıqlı xəbərin təkzib olunması qərara alınıb.

Vəkil məhkəmənin qərarını da müsbət dəyərləndirib.

Jurnalist Əfruzə Ağayeva isə məhkəmənin qərarından tam razı qalmadığını açıqlayıb:

“Qərarla tam razı deyiləm, yenidən Apelasiya Məhkəməsinə müraciət edəcəm. Çünki hakim K.Zeynallının üzr istəməsi ilə bərabər, mənim də çalışdığım saytda aparıcı Şəbnəm Həsənovanın yazısına görə təkzib verməyimi istəyib. Amma mən bunu etməyəcəm. Çünki yalan yazmamışam. Şəbnəm xanımın bizdə səs yazısı var, o deyir ki, Kamilin mənə söydükləri nəslindəki xanımlara getsin”.