Axar.az
Yuxarı

Qafqaz Universitetini hansı təhlükə gözləyir – Açıqlama

Ana səhifə Toplum
12 Punto 14 Punto 16 Punto 18 Punto

Azərbaycan Dövlət Neft Şirkətinin təsisçisi olduğu Azərbaycan Beynəlxalq Təhsil Kompleksinin nəzdində fəaliyyət göstərən "Araz Kursları" MMC, onun təsisçisi olduğu digər qurumların və ümumtəhsil məktəblərinin (1 gimnaziya, 11 lisey və 1 Beynəlxalq İstedadlar Kompleksi) fəaliyyətini dayandırmasından sonra "ÇAĞ Öyrətim" İşlətmələri ətrafında gedən söz-söhbətlər səngimək bilmir.

Axar.az bu son olayların Qafqaz Universitetinə təsirini öyrənmək üçün universitetin İctimaiyyətlə əlaqələr üzrə prorektoru Natiq Paşa ilə bu mövzu ətrafında hazırladığı müsahibəni təqdim edir.

- "Araz kursları"nın bağlanmasından sonra Qafqaz Universitetini hansısa təhlükə gözləyirmi?

- Dünən İdarə Heyəti qərar qəbul edib, bizə də qərara hörmət edib yerinə yetirmək qalır. İdarə Heyəti belə məsləhət görüb ki, ümumtəhsil məktəbləri də daxil olmaqla "Araz kursları" bağlansın, amma Qafqaz Universitetinin fəaliyyəti davam etdirilsin. Yayılan başqa məlumatların hamısı dezinformasiyadır. Universitet fəaliyyətini davam etdirir, heç bir narahatlıq yoxdur. Əksini arzu edən insanlar var əlbəttə, buna bazar rəqabəti də, gözü götürməyən insanların istəyi də demək olar. Rəsmi olaraq Qafqaz Universitetinin bağlanacağı haqda heç bir məlumat yoxdur.

Qafqaz Universitetinə bu il Təhsil Nazirliyi tərəfindən 930 yer verilib, bu, abituriyent jurnalında da artıq elan olunub. Bunun 530-u dövlət sifarişlidir, 400-ü ödənişli əsaslarladır, fəaliyyətimizi uğurla davam etdiririk.

- Qafqaz Universitetinin rəhbərliyinin Türkiyə türklərinin əlindən alınıb tam olaraq azərbaycanlıların ixtiyarına verilməsi barədə yayılan məlumatlar var. Bu haqda sizə hər hansı məlumat verilib?

- Elə bir şey gündəmdə yoxdur. Onsuz da Qafqaz Universitetində dərs deyən müəllimlərin 89%-i azərbaycanlı (bu göstərici 87% idi, bu il 89%-ə çıxıb, hər il də artmaqda davam edir), yerdə qalır 11%. Bu 11% də sadəcə, türklərdən ibarət deyil, bunların arasında Misirdən, Pakistandan, Amerika və Rusiyadan olan müəllimlərimiz də var. Bunların hamısı 11% təşkil edir, rəqəmləri dəqiq xatırlamıram indi, azərbaycanlı olmayan müəllimlərin cəmi sayı, təxminən 30 nəfərdir. Universitetin idarəsindən də türklərin alınması, dəyişdirilməsi, artıb-azalması məsələsi yoxdur gündəlikdə. Amma mətbuat daha yaxşı bilir bunu, bir adam hər hansı müəssisəni ömürlük idarə edəcək kimi bir qanun yoxdur. Hər zaman hansısa bir dəyişiklik ola bilər.

- Qafqaz Universitetinin Təhsil Nazirliyinin sərəncamına keçməsi mümkündürmü?

- Belə bir şey yoxdur. Amma olarsa, çox sevinərik, etiraz etmərik yəni (gülür). Dediyim kimi, onsuz da qəbulda 930 yerin 530-u dövlət sifarişlidir, təxminən 60%-ə yaxınının təhsil haqqı dövlət tərəfindən ödənilir.

- Hal-hazırda Universitetdə təhsil alan tələbələr, onların valideynləri narahatlıqlarını bildirirlərmi?

- Nəinki tələbələr, valideynlər, eləcə də dostlarımız, qafqazsevərlər çox narahat olublar bu məsələlərə görə. Zəng vururlar, gəlirlər, amma bir daha buradan da bildirmək istəyirəm ki, narahatlığa heç bir əsas yoxdur. Bizim üst qurumumuz olan Beynəlxalq Təhsil Mərkəzinin idarə heyəti Qafqaz Universitetinin fəaliyyətinin davam etdirəcəyini rəsmi surətdə bildirib. Dəyişiklik, bağlanma hər qurumda olduğu kimi daxili bir işdir, daxili bir prosedur, daxili siyasətdir və bu hər qurumda ola bilər. Bu il bizdə yeni, "İnşaat mühəndisliyi" adlı fakültə açılır. Bu ixtisası açmaqda xüsusi bir məqsədimiz yoxdur, sadəcə, ehtiyac, tələbat var, ona görə açılır. Yəni tələbat yoxdur deyə, "Araz kursları" bağlanır, bu mənim fikrim deyil, mən düşünürəm ki, əgər bir təşkilatın idarə heyəti, rəhbərliyi belə qərar qəbul edirsə, Təhsil Nazirliyi belə açıqlama verirsə, biz buna sayğıyla yanaşmalıyıq, üzərimizə düşən nə isə, onu da yerinə yetirməliyik və yetirəcəyik.

- Sizcə bu söz-söhbətlər qəbul imtahanları zamanı faizlərə təsir edəcək?

- Bunu zaman göstərəcək, arzu edirik ki, etməsin. QU keçən il birinci mərhələdən, ikinci mərhələyə yer qalmadan bütün yerləri 100% doldurub. Arzu edirik ki, bu il də davam eləsin bu uğur. Bu il uğurlarımız bol olub. Universitetdə 3 konfrans keçirmişik. İkisini tək bizim universitet, birini müştərək. İyun ayının 11-i məzun törəni oldu universitetimizdə, çoxlu qonaqlarımız, rəsmi şəxslər iştirak etdi tədbirlərimizdə. Bunların münasibətində heç bir dəyişiklik hiss etməmişəm mən. Amma təsir edib-etmədiyini qəbuldan sonra dəqiq demək olar, əgər yerlər 100% dolsa, demək təsiri olmayıb, əksi olsa, demək, təsir edib bu söz-söhbətlər.

- QU ilə bağlı problemlər bu ildən başladığı görünür. Müəllimlərin SOCAR işçiləri ilə danışıqlarının səs yazılarının yayılması və s. Sizcə, buna səbəb 2013-cü ilin oktyabrında Türkiyədə başlayan hadisələrdir, yoxsa problemin Türkiyə ilə əlaqəsi yoxdur?

- Sadəcə, onu deyə bilərəm ki, Qafqaz Universitetinin hal-hazırda Türkiyə ilə heç bir orqanik, dolayı və birbaşa əlaqəsi yoxdur. QU Azərbaycanda təsis olunmuş, Azərbaycan Təhsil Nazirliyinin proqramları ilə, nəzdində fəaliyyət göstərən, hazırda da Beynəlxalq Təhsil Mərkəzinin (ictimai birlik şəklində olsa da) tərkibində olan bir müstəqil Universitetdir. Bizim nə qəbul, nə idarəetmə, nə də maliyyə söhbətlərinə Türkiyənin heç bir qarışacağı yoxdur. Misal üçün deyim, Xəzər Universitetinin rektoru bir neçə il bundan qabaq, səhv etmirəmsə, Amerikadan təyin olunmuşdu, xarici ölkələrdən Azərbaycan təhsil müəssisələrinə rəhbər təyin oluna bilər, müəllimlər gəlib burda dərs deyə bilər. Vaxtilə Qafqaz Universiteti də qurulanda Türkiyədən müəllim, idarə heyəti dəvət olunub Universitetin qurulmasında iştirak ediblər. Universitetin təsisçiləri içərisində türkiyəli iş adamları da olub. Universitetin yaranmasında Türkiyənin dolayı bir bağı olub. Hal-hazırda isə Türkiyə ilə qətiyyən əlaqəsi yoxdur. O biri təhsil müəssisələrinin bağlanmasının da Türkiyə ilə əlaqəli olduğunu düşünmürəm, dediyim kimi, şirkət, birlik daxilində verilən bir qərardır bu. Niyəsini artıq biz müzakirə etmirik, yetkililərin, üstqurumun aldığı bir qərardır. Məncə, diqqətin daha çox Qafqaz Universitetinə yönləndirilməsi üçün alınan bir qərardır.

Son olaraq demək istəyirəm ki, heç bir narahatlıq yoxdur, dünən olduğu kimi Qafqaz Universiteti bu gün də fəaliyyətini davam elətdirir. Daha da inkişaf edəcəyinə inanırıq və buna çalışacağıq.

Tarix
2014.06.20 / 12:12
Müəllif
Nilufər Muğantürk
Şərhlər
Digər xəbərlər

Ölkədə son 20 ilin rekord daşqınları qeydə alındı

İlham Əliyev Kəlbəcər və Laçına səfər etdi

Səfirimizdən İran şirkətlərinə çağırış...

Orduda silsilə tədbirlər keçirildi

Türkiyə MN Ordumuzu belə təbrik etdi - Video

Ölkədə koronavirusa yoluxanların sayı açıqlandı

Tiflisdə Azərbaycanın Ordu Günü qeyd edildi

Kürmükçay İlisu məntəqəsindən sel keçdi - Video

Qərbin birliyi Putinə siqnaldır - Şolts

Mingəçevirdə 35 sürücü cərimələndi

KULT
<>
Xəbər xətti
Axar.az'da reklam Bağla
Reklam
Bize yazin Bağla