"Kimlərsə Ukraynada baş verən hadisələri Azərbaycan diasporunun zəifliyi kimi dəyərləndirirsə, bu cür adamların siyasətdən ümumiyyətlə anlayışı yoxdur. Mən başa düşə bilmirəm ki, bu cür düşünənlər nə ilə məşğul olur? Azərbaycan diasporu bu cür məsələlərdə hələ ki, söz sahibi olmasa da, Ukraynada diasporumuzun fəaliyyəti kifayət qədər güclüdür. Təbii ki, əgər Ukrayna ərazi bütövlüyünə qarşı təxribatlarla üzləşirsə, o zaman bu ölkənin vətəndaşları olan soydaşlarımız, o cümlədən Azərbaycan diasporu dövlətin yanında olur. Bunu Ukraynadakı diaspora nümayəndələrimiz də zaman-zaman bəyan ediblər".

Axar.az xəbər verir ki, bu sözləri Diasporla İş üzrə Dövlət Komitəsinin sədri Nazim İbrahimov Publika.az-a geniş müsahibəsində dilə gətirib.

Azərbaycanın Ukrayna və Gürcüstanda diaspor fəaliyyəti barədə danışan komitə sədri daha sonra Rusiya Azərbaycanlıları Federal Milli-Mədəni Muxtariyyətinin (AzerRos) fəaliyyətinə münasibət bildirib. Quruma rəhbərlik edən Baş nazirin keçmiş birinci müavini Abbas Abbasovun fəaliyyətinin bütün çalarları ilə göz qabağında olduğunu vurğulayan N.İbrahimov onun işini neqativ qiymətləndirib:

"Xoşagəlməyən haldır ki, Azərbaycan hökumətinin üzvü olan, Azərbaycan hökumətində formalaşmış bir adam indi də gedib Rusiyada Azərbaycan əleyhinə iş aparsın. Bu, yaxşı hərəkət deyil. Faktiki olaraq indi də əgər Abbas Abbasovun bu cür əməlləri varsa, o zaman o, bu əməlindən geri çəkilməlidir".