Lənkəran ərazisində "Qırmızı Kitab"da qeydiyyatda olan maxaon kəpənəyi aşkar edilib.

Kənd Təsərrüfatı Nazirliyindən Axar.az-a verilən məlumata görə, Dövlət Fitosanitar Nəzarəti Xidmətinin mütəxəssisləri tərəfindən həyata keçirilən növbəti monitorinqlər zamanı Lənkəran rayon ərazisində, Hirkan Milli Parkına yaxın şəxsi təsərrüfat sahələrində naməlum kəpənəklərin tırtılları aşkar edilib. Onun maxaon kəpənəyinin (popilio machaon L.) tırtılları olduğu məlum olub.

Bu kəpənək daha çox Rusiyanın Volqoqrad əyalətində, Cənub-Şərqi İspaniya, İtaliya, Cənubi Fransa, Yunanıstan, Cənubi Qafqaz, İran, Kiçik Asiya, Orta Asiyanın cənub-qərbi, Naxçıvan MR ərazisinin Araz çayı vadisindən başlayaraq dəniz səviyyəsindən 1750 m-ə qədər yüksəkliyi olan dağlarda geniş yayılıblar.

Nazirlik maxaon kəpənəyinin nadir növ olduğunu nəzərə alaraq, həyətyanı sahələrdə bu kəpənəyin tırtıllarını müşahidə edən vətəndaşlardan xahiş edir ki, tırtıllar tərəfindən vurulan ziyanın qarşısını almaq məqsədilə onları əl ilə ehtiyatla yığaraq sahələrdən kənarda təbiətə buraxsınlar.