Azərbaycanın Baş naziri Artur Rasizadənin atası Tahir Rasizadə İkinci Dünya Müharibəsi vaxtı Krımda itkin düşüb.

Axar.az xəbər verir ki, bu barədə Krımdakı Azərbaycan Cəmiyyətinin rəhbəri Rahim Hümbətov məlumat verib.

"Kiçik leytenant Rasizadə Tahir Məmməd oğlu Krım cəbhəsində bölük komandiri olub. Gərgin döyüşlər zamanı 1942-ci ilin fevralında itkin düşüb. Cəbhədəki çətin vəziyyət əksər hərbçilərin sonrakı taleyini müəyyənləşdirməyə imkan vermirdi, ona görə də onlar itkin düşmüş kimi qeydiyyata alınırdılar", - Hümbətov deyib.

Frontovoye kəndində bir neçə rəsmi qardaşlıq məzarı var, lakin onların soyadları qeyd olunmayıb.

Hümbətovun sözlərinə görə, müharibə vaxtı ölən əsgərlərin şəxsiyətinin müəyyənləşdirilməsi üçün ekspedisiya təşkil olunacaq.

"Krımın faşistlərdən azad olunması uğrunda minlərlə azərbaycanlı iştirak edib. Biz ümid edirik ki, bu xoşməramlı işlə məşğul olan könüllülər adsız qəhrəmanlarmızın adlarını müəyyən edəcəklər", - Hümbətov bildirib.