Muğan Aqrosənaye və Heyvandarlıq Kompleksi ölkənin şimal-qərbində ən önəmli şirkət və iqtisadi müəssisələrdən biridir. İlkin araşdırmalara görə, onun qiyməti 2700 milyard tüməndən çoxdur.

Axar.az xəbər verir ki, bu sözləri Güney Azərbaycanın Ərdəbil əyalətinin prokuroru Nasir Ətəbati Muğan Aqrosənaye və Heyvandarlıq Kompleksinin aşağı qiymətə özəlləşdirilməsi haqda deyib. O bu məsələni xüsusi diqqətdə saxlayacağını qeyd edib:

“Şirkətin özəl sektora buraxılmasının əhəmiyyətini nəzərə alaraq, bu məsələni diqqətdə saxlayacağıq. Özəlləşdirilmə prosesi ilə bağlı “şirkətin mülkiyyəti, ərazisi, fabriklər və avadanlıqlarının qiyməti”, “qanuni qaydaların riayət edilməsi” və “kompleksi alan şirkətin texniki qabiliyyəti, bacarığı və maliyyə imkanları” barədə araşdırma aparılacaq. Muğan Aqrosənaye və Heyvandarlıq Şirkətinin özəlləşdirilməsi prosesini diqqətlə araşdıraraq, sərhədyanı Parsabad əhalisinin mənafeyinin tapdanmasına imkan verməyəcəyik”.

Qeyd edək ki, Muğan Aqrosənaye və Heyvandarlıq Kompleksinə 2.7 trilyon tümən qiymət qoyulub, lakin ötən günlərdə 1.7 trilyon tümənə özəlləşdirilib.