Ana səhifə Toplum |
"Əqrəblərin çəkilməsi mövsüm ərzində 4 faiz enerjiyə qənaət edilməsinə imkan verir".
Bu sözləri Axar.az-a iqtisadçı ekspert Vüqar Bayramov oktyabrın sonuncu həftəsi saat əqrəblərinin bir saat geri çəkilməsi ilə qış vaxtına keçməsinin təsirləri barədə danışarkən bildirdi.
Ekspertin sözlərinə görə, iqtisadi baxımdan bu qərarların əsas səbəbi yeni sistemə keçməklə enerjiyə qənaət etmək imkanının və eləcə də vətəndaşların yeni fəslə adaptasiya edilməsi baxımından əhəmiyyəti ilə bağlıdır:
"Əqrəblərin çəkilməsi enerjiyə qənaət edilməsinə imkan verir. Bu, bütün ev təsərrüfatları daxil olmaqla, təxminən 50 milyon manata yaxın qənaət deməkdir. Həmçinin, aqrar sektorun işləmək imkanlarını genişləndirir. Çünki aqrar sektorda iş daha tez başlayır".
V.Bayramovun fikrincə, saat əqrəblərinin geri çəkilməsi beynəlxalq sərnişin və yük daşımalarında da beynəlxalq standartlara uyğunlaşmaya imkan verir:
"Bununla da bu nəqliyyat növünün mənfəətlə işləməkdə davam etməsinə imkan yaradır. İnsanların psixoloji olaraq mövsümü dəyişiliklərə uyğunlaşdırılmasına imkan verir ki, bu da əmək məhsuldarlığını artırır və iqtisadiyyata müsbət təsir göstərir".
Qeyd edək ki, oktyabr ayının son bazar günü saat 05.00-da saatların əqrəbləri 1 saat geri çəkiləcək. Bununla da ölkə qış vaxtına keçəcək.
Tarix
2014.10.23 / 14:40
|
Müəllif
Nigar İxtiyarqızı
|