Dünyada 5G şəbəkəsi tətbiq edildiyi zaman “Bakcell” şirkəti də bu xidməti istifadəçilərinə təqdim edəcək.

Axar.az xəbər verir ki, bu sözləri jurnalistlərə açıqlamasında “Bakcell” şirkətinin baş icraçı direktoru Nikolai Beckers deyib. O bildirib ki, 5G şəbəkəsinin tətbiq edilməsi lisenziya və tezliklərlə yanaşı, dünya təcrübəsindən də asılıdır:

“Təbii ki, bu, bir az vaxt aparan prosesdir. Amma ümumi olaraq, biz buna hazırıq. 2019-cu il ərzində 4G şəbəkəsinin genişləndirilməsi və onun inkişafı üzərində işləyəcəyik. Gələn ilin sonuna qədər “Bakcell” Azərbaycan əhalisinin 95 faizini 4G şəbəkəsi ilə əhatə etməyi planlaşdırıb”. Düşünürəm ki, 5G dünyada 2020-ci ildən tez istifadəyə verilməyəcək. Bunun üçün hər şeydən əvvəl bazarda 5G şəbəkəsini dəstəkləyən cihazlar olmalıdır”.

Beckers bildirib ki, dünyada mobil operatorların gəlirlərinin formalaşmasında internet xidmətinin payı artır:

“Bunu nəzərə alan mobil telefon istehsalçıları da internet xidmətlərini daha çox dəstəkləyən proqram həllərinə malik məhsul buraxmağa çalışırlar. Azərbaycanda və dünyanın bir çox yerlərində hələ də səs xidmətləri öz populyarlığını qoruyub saxlayır. Ancaq mobil telekommunikasiya bazarının getdiyi istiqamət onu göstərir ki, getdikcə mobil internet xidmətlərindən daha çox istifadə ediləcək və bu, səs xidmətlərini üstələyəcək”.

Bundan başqa, Nikolai Beckers 2019-cu ildə öz şəbəkəsinə investisiya yatırmağa davam etdirəcəyini bildirib.