“Kasperski”dən sonra bütün dövlət qurumlarında mərkəzləşdirilmiş formada yalnız “Trend Micro” antivirusundan istifadə olunacaq.

Axar.az xəbər verir ki, bunu Azərbaycan İnternet Forumunun prezidenti Osman Gündüz qeyd edib. O bildirib ki, artıq bir neçə ildir Yaponiyanın “Trend Micro” şirkətinin məhsulları ölkəmizdə böyük şirkətlərdə və dövlət qurumlarında tətbiq olunur:

“Bu vaxta qədər bizdə əsasən Rusiyanın “Kasperski” məhsulları üstünlük təşkil edirdi. Artıq cari ildən XDMX-nin Xüsusi Rabitə və İnformasiya Təhlükəsizliyi Dövlət Agentliyi bütün dövlət qurumlarına “Trend Micro”nun tətbiqi ilə bağlı təlimlər keçməyə başlayıb.

Bir müddət öncə “Kasperski”dən imtina edilməsi ilə bağlı dövlət qurumlarına xəbərdarlıqlar olunmuşdu. Belə qənaətə gəlmək olar ki, “Kasperski”dən sonra bütün dövlət qurumlarında mərkəzləşdirilmiş formada yalnız “Trend Micro” antivirusundan istifadə olunacaq”.

Osman Gündüz “Trend Micro”nun dünyada böyük məlumat bazaların qorunması və kibertəhlükəsizlik sahəsində lider şirkətlərdən biri olduğunu deyib. Onun sözlərinə görə “Trend Micro” başqa bu tip qurumlardan fərqli olaraq yeni nəsil kibertəhlükəsizlik imkanlarına malikdir.

Qeyd edək ki, ötən il "Kasperski Lab"ın adı ABŞ dövlət qurumları üçün informasiya texnologiyaları və rəqəmsal fotoavadanlıq sahəsində xidmətlər təklif edən şirkətlərin siyahısından silinib. "Blomberq" agentliyi "Kasperski Lab" şirkətinin Rusiya kəşfiyyatı ilə əlaqəli olduğuna dair məlumatlar yayıb.