Ana səhifə Toplum |
Rabitə və yüksək texnologiyalar naziri Əli Abbasov Macarıstanın xarici işlər və ticarət naziri Peter Siyartonun başçılıq etdiyi nümayəndə heyəti ilə görüşüb.
Axar.az RYTN-ın rəsmi saytına istinadən xəbər verir ki
Azərbaycanla Macarıstan arasında ikitərəfli münasibətlərin dostluq,
tərəfdaşlıq prinsipləri üzərində qurulduğunu qeyd edən nazir Əli
Abbasov əlaqələrin uğurlu inkişafının digər istiqamətlər kimi,
informasiya-kommunikasiya texnologiyaları sahəsinə də nüfuz
etdiyini vurğulayıb.
Sektorun inkişafının təmin edilməsi üzrə Azərbaycanın həyata
keçirdiyi islahatlardan da söz açan nazir gələcək illərdə
strategiyaya əsasən nəzərdə tutulan tədbirlər, o cümlədən insan
resursları və biliklər potensialının formalaşdırılması, xarici və
daxili investorları özünə cəlb edən əlverişli iqtisadi və biznes
mühitinin yaradılması, innovativ layihələrin həyata keçirilməsi
üçün maliyyə resurslarına çıxışın asanlaşdırılması kimi üç əsas
sütunu cəmləşdirən "Qızıl üçbucaq" konsepsiyasından söz açıb.
İnnovativ əsaslı inkişaf modelinin reallaşması, ölkənin regional
İKT mərkəzinə çevrilməsi üçün Azərbaycanda Məlumatların Emalı və
Saxlanılması Mərkəzinin qurulmasının vacibliyinə də diqqət çəkən
nazir bu sahədə Avropa Nüvə Tədqiqatları Mərkəzi (CERN) ilə
aparılan işlərdən danışaraq, macar təcrübəsinə də böyük əhəmiyyət
verildiyini bildirib.
Tərəflər arasında əlaqələrin yüksək səviyyəsindən, dinamik
inkişafından məmnunluğunu ifadə edən Peter Siyarto da
münasibətlərin daha da dərinləşdirilməsi üçün yaxşı
perspektivlərin, qarşılıqlı marağın olduğunu nəzərə çatdırıb.
Azərbaycan Respublikası Hökuməti və Macarıstan Respublikası
Hökuməti arasında İqtisadi Əməkdaşlıq üzrə Birgə Komissiyanın
iclaslarından da söz açan macarıstanlı nazir strateji münasibətlər
fonunda Azərbaycanın İKT sahəsində macar təcrübəsinin tətbiqinin
töhfə verə biləcəyini də qeyd edib. Xüsusən yüksək texnologiyalar
sahəsi üzrə birgə layihələrin reallaşmasını, həmçinin müştərək
layihələr əsasında üçüncü ölkə bazarlarına investisiya
qoyuluşlarını dəstəklədiyini də vurğulayan Peter Siyarto bu addımın
əməkdaşlığın daha da dərinləşməsinə təkan verəcəyini
bildirib.
Azərbaycanla əməkdaşlığın inkişaf etdirilməsində "BakuTel" sərgisinin bir platforma kimi macar şirkətlərinin diqqətini cəlb etdiyini də vurğulayan qonaq onların sayca 20-ci telekommunikasiya sərgisində də milli pavilyonla təmsil olunacaqlarını, həmçinin sərgi çərçivəsində keçiriləcək Nazirlər Toplantısına Macarıstanın rəsmi nümayəndələrinin qatılacağını diqqətə çatdırıb.
Tarix
2014.11.04 / 15:33
|
Müəllif
Axar.az
|