Ana səhifə Toplum |
14:59
Qondarma Qarabağ rejimi azərbaycanlı girov Elnur Elman oğlu Hüseynzadəni həbsdən azad edib.
Axar.az xəbər verir ki, bu məlumatı “Lragir.am” saytı yayıb. Onun fevralın 2-də həbsdən azad edildiyi vurğulanıb.
“Sputnik Ermənistan”a açıqlama verən qondarma rejim liderinin mətbuat katibi David Babayan Hüseynzadənin üçüncü ölkəyə göndəriləcəyini bildirib. Onun Azərbaycana geri qayıtmaqdan imtina etdiyi vurğulanıb.
Qeyd edək ki, 2017-ci ilin fevral ayında cəbhənin Talış istiqamətində Ermənistan hərbçiləri Azərbaycan Respublikasının vətəndaşı, 1995-ci il təvəllüdlü Hüseynzadə Elnur Elman oğlunu girov götürüb.
Azərbaycan Müdafiə Nazirliyi də dərhal məsələ ilə bağlı bəyanat yayaraq, ermənilərin əlinə düşən E.Hüseynzadənin mütəmadi olaraq hərbi intizamı pozması və xidmətə çıxmaması səbəbindən bir müddət əvvəl Silahlı Qüvvələrdən tərxis olunduğunu, hazırda hərbi xidmətdə olmadığını bildirdi.
Həmin il fevral ayının 5-də isə qondarma rejim məhkəməsi Elnur Hüseynzadə barəsində iki aylıq həbs-qətimkan tədbiri seçilməsi ilə bağlı qərar qəbul etdi.
***
Əsir və itkin düşmüş, girov götürülmüş vətəndaşlarla əlaqədar Dövlət Komissiyasidan Axar.az-ın sorğusuna cavab olaraq bildirilib ki, aidiyyəti beynəlxalq təşkilatlardan daxil olmuş məlumata əsasən, 1 fevral 2017-ci il tarixdə Ermənistan hərbçiləri tərəfindən işğal edilmiş Dağlıq Qarabağ ərazisində saxlanılmış və separatçı rejimin qeyri-qanuni məhkəməsi tərəfindən “azadlıqdan məhrum edilmiş” Azərbaycan Respublikasının vətəndaşı, 1995-ci il təvəllüdlü Hüseynzadə Elnur Elman oğlu 2 fevral 2019-cu il tarixdə saxlanıldığı Şuşa şəhərindən Ermənistan Respublikasına aparılıb:
“Saxlanıldığı vaxtdan etibarən E.Hüseynzadənin azad edilməsi ilə bağlı aidiyyəti beynəlxalq təşkilatlar qarşısında məsələ qaldırılmış və hazırda bu istiqamətdə zəruri işlər aparılır”, - deyə məlumatda qeyd olunub.
Tarix
2019.02.05 / 15:47
|
Müəllif
İlkin, Firuzə
|