Millət vəkili Qənirə Paşayeva heyəti Şri-Lankanın paytaxtı Kolomboda keçirilən “Qadınların gələcəyi 2019” adlı II beynəlxalq konfrans çərçivəsində Hindistan nümayəndə heyəti ilə görüş keçirib.

Axar.az xəbər verir ki, millət vəkili və Azərbaycanın bir qrup fəal qadını görüş zamanı Hindistan nümayəndə heyətinin üzvlərinə Azərbaycanın tarixi, mədəniyyəti, inkişafı və iqtisadi imkanları barədə geniş məlumat veriblər.

Görüşdə Ermənistanın işğal etdiyi Azərbaycan torpaqlarında törətdiyi vandalizm aktlarından da bəhs edilib.

Hindistan nümayəndə heyətinin üzvləri Azərbaycanla əməkdaşlığın və dostluğun inkişafına önəm verdiklərini bildiriblər və münasibətlərin getdikcə daha da inkişaf edəcəyinə inamlarını ifadə ediblər.

Görüşdə qadın siyasətçiləri, iş adamları, QHT və KİV nümayəndələri arasında münasibətlərin və qarşılıqlı səfərlərin vacibliyi də xüsusilə vurğulanıb.

Görüşün sonunda Hindistan nümayəndə heyəti ölkəmizə dəvət edilib və onlara Azərbaycan mədəniyyəti ilə bağlı hədiyyə və materiallar təqdim edilib.