Bakıda yaşayış evlərində su sayğaclarının sıradan çıxması halları artıb. Paytaxtda qeyri-sabit hava şəraiti mənzilərdə, fərdi yaşayış evlərində bu problemi yaradıb.

Axar.az-a şəhər sakinlərinin verdiyi məlumata görə, sayğacların sındırılması, şaxtalı günlərdə donvurma nəticəsində sıradan çıxması tez-tez baş verir. Bu da öz növbəsində abonentlərlə "Azərsu" ASC-ni üz-üzə qoyur. Bir çox hallarda abonentlər tələb edirlər ki, onların sıradan çıxan su sayğaclarını yenisi ilə aidiyyəti qurum əvəzləməlidir. Qış aylarında, xüsusən şaxtalı günlərdə sayğacların donvurmadan qorunması üçün lazımi tədbirlər görülsə də, bu problemdən birdəfəlik azad olmaq mümkün deyil.

"Azərsu" ASC-nin mətbuat xidmətindən AzərTAc-a bildirilib ki, suölçən cihazların işlək vəziyyətdə saxlanılmasına, o cümlədən üzərindəki plombların toxunulmazlığına istehlakçı cavabdehlik daşıyır. Yəni mənzillərdə, fərdi yaşayış evlərində və həyətyanı sahələrdə quraşdırılmış sayğaclar istənilən kənar müdaxilə nəticəsində zədələnərək sıradan çıxarsa, onların yeniləri ilə əvəzlənməsi abonentlərin vəsaiti hesabına həyata keçiriləcək.