Azərbaycan Respublikası millətlərarsı, multikulturalizm
və dini məsələlər üzrə Dövlət müşaviri, akademik Kamal Abdullayev
dekabrın 24-də müşavirə keçirib.
Axar.az xəbər verir ki, zəngin gündəliyi olan müşavirədə
Azərbaycan Respublikasının Prezidenti yanında Bilik Fondunun, Bakı
Beynəlxalq Multikulturalizm Mərkəzinin, Bakı Slavyan
Universitetinin, "Kultura+" internet televiziyasının kollektivləri
iştirak edib.
"Prezidentin hər sözü bizim üçün yeni istiqamət, yeni
hədəfdir"
Əvvəlcə K.Abdullayev Azərbaycan Respublikasının Prezidenti, Ali
Baş Komandan İlham Əliyevin doğum günü münasibəti ilə xalqı təbrik
edib:
"İlham Əliyev Azərbaycanın daxili və xarici siyasətinin uğurları
üçün son dərəcədə titanik işlər görür. Ölkəmizin həqiqətlərinin
tanıdılması, dünyadakı nüfuzumuzun artması cənab prezidentin
amalıdır. Fiziki və intellektual cəhətdən son dərəcə ağır bir yükü
çiyinlərinə götürərək böyük ləyaqətlə daşıyan prezident Azərbaycan
naminə, Ulu öndər Heydər Əliyevin ruhuna sədaqət naminə yorulmadan
irəliləyir. Biz bu yolda onun köməkçiləri, yaxın
silahdaşlarıyıq".
Azərbaycanda son dövrlər bütün sahələrdə cahanşümul işlər
görüldüyünü xatırladan Dövlət müşaviri multikulturalizm
istiqamətində həyata keçirilən tədbirləri xüsusi vurğulayıb:
"Cənab Prezident çıxışlarında hər dəfə qeyd edir ki,
azərbaycanlının həyat tərzinə çevrilən multikulturalizm,
tolerantlıq dünya üçün nümunədir. İlham Əliyev bir il ərzində
millətlərarası, multikulturalizm və dini məsələlər üzrə Dövlət
müşavirliyi yaratdı. Prezidentin Fərmanı ilə Bilik Fondu, Bakı
Beynəlxalq Multikulturalizm Mərkəzinin formalaşması da həmin
missiyanın davamıdır. Bakı Slavyan Universiteti də bu amala xidmət
edir. Azərbaycanın daxili, xarici, hüquq siyasətinin prioriteti
olan multikulturalizm təkcə adını çəkdiyim qurumların deyil, digər
rəsmi orqanların, vətəndaş cəmiyyəti institutlarının, təhsil və elm
ocaqlarının əsas fəaliyyət istiqamətlərindən biridir. Artıq öz
işini qurmuş Bilik Fondu, yeni fəaliyyətə başlayan Bakı Beynəlxalq
Multikulturalizm Mərkəzi Azərbaycandan kənarda da tanınır".
Dövlət müşaviri K.Abdullayev deyib ki, cənab prezident
multikulturalizm istiqmətində görülən işlərə həmişə xüsusi diqqətlə
yanaşıb: "İlham Əliyev "Rossiya-24" telekanalına verdiyi sonuncu
müsahibədə Azərbaycandakı tolerant mühit, xüsusən Bakı Beynəlxalq
Multikulturalizm Mərkəzi barədə məmnunluqla söhbət açıb, Bakı
Slavyan Universitetinin adını çəkib. Prezidentin söylədiyi hər bir
söz bizim üçün yeni istiqamət, yeni hədəfdir. Bütün dünyanın rəğbət
bəslədiyi siyasətçi, Azərbaycan xalqının ləyaqətli oğlu İlham
Əliyevin doğum günü münasibəti ilə bir daha hamınızı təbrik edirəm.
Cənab prezidentə can sağlığı, ailəsi ilə birgə səadət arzulayıram.
Ən böyük problemimiz olan Dağlıq Qarabağın işğaldan azad
olunmasından tutmuş, ucqar kənddə yaşayan sadə vətəndaşın həyatının
gözəlləşdirilməsinə qədər gördüyü bütün işlərdə Prezident İlham
Əliyevə "Allah yardımçınız olsun" deyək".
Bilik Fondunun içraçı direktoru Oktay Səmədov cənab prezidentin
cəmiyyətin maarifləndirilməsi istiqamətindəki fəaliyyətinə diqqət
çəkib. Onun sözlərinə görə, İlham Əliyevin hər bir azərbaycanlıya
göstərdiyi diqqət və qayğı ölçüyəgəlməzdir.
BSU-nun rektoru Asif Hacıyev universitetin inkişafında Prezident
İlham Əliyevin müstəsna xidmətlərindən danışıb: "Bakı Slavyan
Universiteti cənab İlham Əliyevin doğum gününü həmişə böyük şövqlə
yaşayır. Əvvəllər xarici qonaqları universitetə dəvət edirdiksə,
indi bizim məkanı doğma ocaqları bilib, özləri böyük həvəslə
gəlirlər. Xarici ölkə ünversitetləri BSU-nun nəzdində mərkəzlərinin
yaradılmasını arzulayırlar. Halbuki, Bakı Slavyan Universiteti yeni
yarananda biz xarici həmkarlarımıza əməkdaşlıqla bağlı müraciət
edirdik. Nailiyyətlərimiz cənab prezidentin Azərbaycana
qazandırdığı nüfuzun nəticəsidir. Hər birimiz prezidentimizin
əsgəriyik".
Bakı Beynəlxalq Multikulturalizm Mərkəzinin fəaliyyətindən
danışan Dövlət müşaviri Kamal Abdullayev isə tezliklə yerli və
xarici ali təhsil ocaqlarında bakalavr və magistratura pilləsində
"Multikulturalizmə giriş" və "Azərbaycan multikulturalizmi"
fənlərinin tədris olunacağını bildirib. Onun sözlərinə görə, artıq
dünyanın 7 nüfuzlu universiteti ilə bu barədə razılıq əldə olunub.
Fənnin tədrisi üçün yüksək ixtisaslı kadrların hazırlanması üzrə
proqram həyata keçirilir. "Təsəvvür edin, xarici bir vətəndaş
"Azərbaycan multikulturalizmi" fənni çərçivəsində ölkəmizin
tarixini, dilini, mədəniyyətini, coğrafiyasını öyrənəcək. Zamanla
dünya ictimaiyyəti Azərbaycanı daha yaxından tanıyacaq".
Dövlət müşaviri K.Abdullayevin fikrincə, Azərbaycan prezidenti
fəaliyyəti ilə ölkəmiz barədə o qədər dəqiq rəy formalaşdırıb ki,
qarşımızda gələcəyə hamar yol açılıb: "Bizə ancaq bu yolu şərəflə
getmək qalır".