Goranboy şəhərində sahibkarlara məxsus anbarlar söküləcək.

Bu barədə Axar.az-a Goranboy rayon sakinləri məlumat veriblər.

Sakinlər söküləcək anbarların Şahmat məktəbi və avtovağzalla üzbəüz mağazaların arxasında yerləşdiyini bildiriblər. Artıq söküntü işləri ilə əlaqədar məhkəmə qərarı sahibkarlara verilib. Qərarı sahibkarlara İcra Hakimiyyətinin Memarlıq və Tikinti Şöbəsinin müdiri Həsənov Qabil, rayonun Torpaq və Xəritəçəkmə Şöbəsinin işçisi olan Nemət adlı şəxs çatdırıb.

Anbarlar həmin sahədə yerləşən "Yeni bazar" adlanacaq obyektə yolun açılması üçün dağıdılacaq. Adı çəkilən obyektin Goranboy Rayon İcra başçısı Nizaməddin Quliyevə məxsus olması da gələn xəbərlər sırasındadır.

Goranboy Rayon İcra Hakimiyyətindən Axar.az-a verilən məlumatda da həmin obyektlərin söküləcəyi ilə bağlı informasiyalar təsdiqləndi. İdarə həmin tikililərin əksəriyyətinin qanundan kənar olduğunu və buna görə məhkəmənin qərarı ilə söküləcəyini açıqladı. Eləcə də artıq bununla bağlı anbar sahiblərinin xəbərdar edildiyi bildirdi.