12:37

Söhüb kəndində avtomobilin dərəyə aşması nəticəsində xəsarət alan iki nəfər ağır vəziyyətdə Quba Mərkəzi Rayon Xəstaxanasına aparılır.

Səhiyyə Nazirliyinin mətbuat xidmətindən Axar.az-a verilən məlumata görə, ərazi üzrə Qonaqkənd tibb məntəqəsinin həkimləri yaralıların vəziyyətini kritik kimi qiymətləndiriblər.

“Təcili tibbi yardım briqadalarının həkimləri hər iki yaralının həyatının təhlükə altında olduğunu bildiriblər”, - məlumatda qeyd edilib.

Qeyd edək ki, bu gün Qubada ağır yol-nəqliyyat hadisəsi baş verib. APA-nın məlumatına görə, rayonun Söhüb kəndində "Azərişıq" Açıq Səhmdar Cəmiyyətinin Quba şöbəsinin əməkdaşlarının olduğu maşın aşıb. Nəticədə 2 nəfər ölüb, 2 nəfər xəsarət alıb.

Faktla bağlı araşdırmalar davam etdirilir.

***

Quba rayonunda Azərişıq ASC-yə məxsus avtomobilin qəzaya uğraması nəticəsində ölən və yaralananların şəxsiyyəti məlum olub.

Axar.az-a daxil olan məlumata görə, hadisə nəticəsində Azərişıq ASC-nin əməkdaşları Zahid Qurbanov və Namiq Rüstəmov hadisə yerində dünyasını dəyişib.

Avtomobildə olan digər əməkdaşlar - Sumqayıt şəhər sakinləri, 1992-ci il təvəllüdlü Abdullayev Saleh Abuzər oğlu və 1984-cü il təvəllüdlü Rəsulov İlkin Mahir oğlu ağır bədən xəsarətləri ilə Quba rayon Mərkəzi Xəstəxanasına yerləşdiriliblər.