Qazax rayonunun Şıxlı kənd sakinləri Şıxlı su kanalında yaranmış nasazlıq ucbatından əziyyət çəkir.

Axar.az xəbər verir ki, bu barədə məlumat Qazaxın Birinci Şıxlı kənd sakinlərinin elektron ünvanımıza göndərdiyi ərizədə qeyd edilib.

Sakinlərin dediyinə görə, başlanğıcını Gürcüstandan Xram çayından götürən Şıxlı su kanalının Sınıq Körpüyə qədər olan hissəsi tam betonlaşdırılıb. 18 km uzunluğundakı ərazisi hələ də betonlaşdırılmayan kanalın məhz bu hissəsi kənd sakinləri üçün öz təsərrüfat sahələrinin suvarılmasında problemlər yaradıb. "Azərbaycan Meliorasiya və Su Təsərrüfatı" Açıq Səhmdar Cəmiyyətinin sədrinə ünvanlanan məktubda kənd sakinləri ondan Şıxlı su kanalının bütün ərazisinin betonlaşdırılmasını istəyiblər:

"Sınıq Körpüdən bəri bütün Şıxlı kanalı torpaq halında qalır. Mütəxəssislərin dediyinə görə, su kanalı saniyədə 800 litr su vurur. Həmin suyun yalnız 40-45%-i kənddəki mənzillərə gəlib çatır. 18 km uzunluğunda olan kanal həddən artıq yararsız, genişlənmiş, dərin quyular, keçilməz qamışlıqlar halında olduğuna görə suyun mənzilə çatmasında böyük problemlər yaranır. Yay aylarında su çatışmır, həyətyanı sahələr, pay torpaqlarında olan məhsullar susuzluqdan yanır. Neçə illərdir ki, yaranmış bu vəziyyət kənddə böyük narazılığa səbəb olur. Şıxlı su kanalına verilən suyun 50%-i itkiyə gedir. Hörmətli Əhməd müəllim, onu da bildiririk ki, yay aylarında Xram çayından su gəlmədikdə Şıxlı su kanalına II Şıxlı, I Şıxlı, Aslanbəyli su nasosları vasitəsilə Kür çayından su vurulur. Kanala 1 saniyədə vurulan 250-300 litr suyun yarısı da itkiyə gedir. Xülasə, Şıxlıda su kanalında vəziyyət olduqca dözülməzdir".

Qeyd edək ki, Şıxlıda su kanalı əvvəlcə 1947-ci ildə, ikinci dəfə 1961-ci ildə çəkilib. 1961-ci ildə çəkilmiş kanal torpaq kanalıdır. Şıxlı su kanalının suyu ilə II Şıxlıda 800 hektar, I Şıxlıda 220 hektar, Aslanbəyli kəndində 300 hektar həyətyanı və pay torpaqları suvarılır.

Onu da xatırladaq ki, faktla əlaqədar "Azərbaycan Meliorasiya və Su Təsərrüfatı" Açıq Səhmdar Cəmiyyəti ilə dəfələrlə əlaqə saxlasaq da, telefonlarımıza cavab verən olmadı. Məsələ ilə əlaqədar ASC-nin mövqeyini dərc etməyə hazırıq.