Azərbaycanda koronavirusun yayılmasının qarşısını almaq üçün tətbiq edilən xüsusi karantin rejiminin yumşaldılmasından sonra avtobuslarda sıxlıq müşahidə edilir. Bu isə avtobusların sayının artırılması zərurətini gündəmə gətirib.

Məsələ ilə bağlı Axar.az-a açıqlama verən Bakı Nəqliyyat Agentliyinin mətbuat katibi Mais Ağayev bildirib ki, avtobusların sayının artırılması vəziyyəti daha çıxılmaz hala salacaq.

“İntervalın artmasına, avtobusların gecikməsinə səbəb olan amillər var. Son günlər nəqliyyatın hərəkətində də intensivlik yaranıb. Bu səbəbdən də yollarda sıxlıqlar yaranır. Təbii, bu hal gecikmələri şərtləndirir. Eyni zamanda, karantin rejimindən irəli gələrək yollarda yoxlanış postları qurulub. Səhər və axşam saatlarında müşahidə aparsanız, şahidi olarsınız ki, yaranan sıxlıqlarda xeyli sayda avtobus hərəkətsiz qalır. Hər postda ən azı 5 və ya daha çox - 10-15 avtobus qalırsa, bu artıq gecikmələrin qaçılmaz olması deməkdir. Ona görə də burada söhbət avtobusların azlığından gedə bilməz, yetərincə avtobus var. Bu cür sıxlıq halında xəttə əlavə avtobus çıxarsaq da, heç nə dəyişməyəcək. Əksinə, vəziyyət daha da pisləşəcək. Bir daha deyim ki, bütün avtobuslar daşımalara cəlb edilib”.