Astarada polisə tabeçilik göstərməyən şəxsin avtomobilindən və evindən külli miqdarda narkotik və silah-sursat götürülüb.

Axar.az Daxili İşlər Nazirliyinin rəsmi saytına istinadən xəbər verir ki, martın 30-da saat 12 radələrində Astara şəhərində Rayon Polis Şöbəsinin əməkdaşı, polis serjantı Ayaz Hüseynov xidmətdə olarkən özünü şübhəli aparan "Kia" markalı avtomobilin sürücüsü Seymur Əliyevdən sənədlərini təqdim etməsini istəyib.

Tabeçilik göstərməyən S.Əliyev avtomobili hərəkətə gətirib. A.Hüseynova ayaq nahiyəsindən xəsarət yetirdikdən sonra maşından düşərək hadisə yerini tərk edib.

S.Əliyevin avtomobilinə baxış zamanı 250 qram heroin, evindən isə 1 kiloqram 100 qram tiryək, 20 qram həşiş, 1 qram antefamin həbi, 1 ədəd müvafiq sənədləri olmayan "İJ" markalı tüfəng, 54 ədəd patron və 1 ədəd beşbarmaq-bıçaq aşkar edilərək götürülüb.

Faktla əlaqədar əməliyyat-axtarış tədbirləri aparılır.