Azərbaycandan Suriyaya gedənlərin sayında azalma müşahidə olunur. Son bir neçə ay ərzində bu tendesiya səngiməkdədir.

Axar.az yazır ki, hüquq-mühafizə orqanları radikal görüşlü şəxslərin adlarından ibarət siyahı tərtib edərək Dövlət Sərhəd Xidmətinə təqdim olunur. Dini Qurumlarla İş üzrə Dövlət Komitəsinin sədri Mübariz Qurbanlı da Cəlilabadda keçirilən konfransda bu məsələyə toxunub.

Dövlət Komitəsinin hüquq-mühafizə orqanları ilə birgə həyata keçirdiyi tədbirləri xüsusi vurğulayan komitə sədri radikalizmin qarşısının alınmasında bu tədbirlərin böyük əhəmiyyəti olduğunu diqqətə çatdırıb. M.Qurbanlı bildirib ki, ölkəmizdə dini radikalizmin sosial bazası yoxdur. Onun sözlərinə görə, həyata keçirilən tədbirlər nəticəsində radikalizmə meyilli qrupların iqtisadi və ideoloji əsasları tamamilə iflasa uğrayıb.

Məlumatda o da deyilir ki, Yaxın Şərqdə gedən müharibədə qanunsuz hərbi birləşmələrə qoşulan azərbaycanlıların bəziləri geri qayıdır, getmək fikrinə düşənlər isə sərhəddə saxlanır. Hazırda onlardan bir neçəsinin məhkəməsi davam edir.