Miqrasiya Mərkəzinin rəhbəri, hazırda Almaniyada yaşayan hüquq müdafiçəsi, xalq şairi və millət vəkili Sabir Rüstəmxanlının qardaşı Əlövsət Əliyevlə bağlı cinayət işinə xitam verilib.

Axar.az xəbər verir ki, bu barədə Əlövsət Əliyev özü məlumat yayıb.

O bildirib ki, 2014-cü ildə vətəndaş cəmiyyətinə olan hucumlardan faydalanan bir yüksək çinli məmurun təkidi ilə aprel ayının 14-də haqqında Azərbaycan Respublikası CM-nin 177.3.2. (Oğurluq, yəni özgənin əmlakını gizli olaraq - külli miqdarda ziyan vurmaqla talama), 320.1 və 320.2 (Rəsmi sənədləri, dövlət təltiflərini, möhürləri, ştampları, blankları saxtalaşdırma, qanunsuz hazırlama, satma və ya saxta sənədlərdən istifadə etmə) və 318.2 (Azərbaycan Respublikasının dövlət sərhədini qanunsuz olaraq keçmə) maddələri ilə cinayət işi başlanılmışdı:

“Qanunsuz həbsdən xilas olmaq üçün ölkədən qaçdım. 14 iyun 2014-cü ildə isə barəmdə həbsli axtarış elan edilmiş, interpol vasitəsilə beynəlxalq axtarışa verilmişdim. Azərbaycana ekstradisiya olunmağım üçün 1 aya yaxın Kiyevdə həbsdə də yatmalı oldum.

Xaricdə olduğum müddətdə cinayət işinin istintaqını aparan müstəntiqlə dəfələrlə danışdım, DİN-in rəhbərliyinə, Baş prokurora dəfələrlə müraciətlər etdim. Daha sonra Azərbaycan Respublikasının Prezidentindən işin obyektiv araşdırılmasının təmin olunması üçün xahiş etdim.

Bu yaxınlarda isə barəmdə olan cinayət işinin xitam olunması haqqında məlumat aldım və çox sevindim. Zəhməti olan hər kəsə təşəkkür edirəm”.

Ə.Əliyev bildirib ki, ölkəyə qayıdandan sonra baş verənlərə hüquqi qiymət verilməsinə nail olacaq:

“İndi səbirsizliklə haqqımda həqiqətə uyğun olmayan, hadisəni daha da böyüdərək sifarişli və yalan məlumatlar paylaşan “tanınmış vəkillər”in, bəzi hüquq-müdafiəçilərinin, barəmdə heç vaxt məhkəmə araşdırılması olmasa da, “bu gün Əlövsət Əliyevin və qeyrilərinin məhkəmə prosesi keçirildi” kimi yalan məlumatlar tirajlayan “aparıcı media kapitanları”nın təkziblərini gözləyirəm”.