5 iyun - Ümumdünya ətraf mühitin mühafizəsi günü ilə
əlaqədar iməcilik keçirilib.
Ekologiya və Təbii Sərvətlər Nazirliyidən Axar.az-a verilən
məlumata görə, 5 iyun - Ümumdünya ətraf mühitin mühafizəsi günü ilə
əlaqədar nazirlik tərəfindən 30 may 2015-ci il tarixində Yeni
Suraxanı-Binə yolunun ətrafında iməcilik keçirilib.
Nazirliyin 500-ə yaxın əməkdaşının, qeyri-hökumət təşkilatları
və ictimaiyyət nümayəndələrinin iştirak etdiyi aksiyada sözügedən
ərazinin 85 hektar sahəsində abadlıq işləri aparılaraq yaşıllıqlara
aqrotexniki qulluq göstərilib, ağacların dibi yumşaldılıb, ərazi
alaq otlarından və tullantılardan təmizlənib.
Qeyd edək ki, 5 iyun - Ümumdünya ətraf mühitin mühafizəsi günü
ilə əlaqədar regionlarda da iməciliklər təşkil olunaraq
yaşıllıqlara qulluq edilib, təmizlik işləri aparılıb. Hər il
Ümumdünya ətraf mühit günü ərəfəsində Ekologiya və Təbii Sərvətlər
Nazirliyi ətraf mühitin qorunması, təbiətdən, yeraltı sulardan,
mineral xammal ehtiyatlarından və yerüstü sərvətlərdən səmərəli
istifadə edilməsi, onların bərpası və mühafizəsi, bioloji
müxtəlifliyin qorunub saxlanılması üçün təbliğat xarakterli
müxtəlif tədbirlər həyata keçirir.
Tədbirlərin keçirilməsində məqsəd insanların ətraf mühitin
mühafizəsinə münasibətini dəyişmək, ictimaiyyətin diqqətini ekoloji
problemlərin həllinə yönəltmək, əhalinin bu sahədə şüur və
təfəkkürünü inkişaf etdirməklə təbiəti qorumağın vacibliyini
diqqətə çatdırmaq, eyni zamanda bu işə digər qurumları və əhalini
də cəlb etməkdir.