Qax rayonunda laçınlı məcburi köçkünlərin məskunlaşdığı fermada yanğın olub.

Axar.az Report-a istinadən xəbər verir ki, hadisə rayonun Cəlayir kəndində, "Qovra" adlanan ərazidə baş verib.

Yanğın Laçın rayonunun Oğuldərə kəndindən olan məcburi köçkün, 66 yaşlı Fazil İlyasov və onun iki oğlunun öz ailələri ilə birgə yaşadığı köhnə tikilidə qeydə alınıb. Nəticədə ümumi sahəsi 886 kvadratmetr olan fermanın184 kvadratmetr çardaq hissəsi və 20 kvadratmetr sahəyə malik otaqlar içərisindəki əşyalarla birlikdə yanıb. Otaqlarda olan əşyaların bir hissəsini yanğından qorumaq mümkün olub.

F.İlyasov deyib ki, hadisə nəticəsində iki gəlininin cehizi, qızılları və ailənin dar gün üçün topladığı 2000 manatdan artıq pul yanıb.

Hadisə yerinə Qax rayon Yanğından Mühafizə Hissəsinin iki yanğınsöndürən texnikası və şəxsi heyəti cəlb edilib. Fermanın qalan hissəsi yanğından mühafizə olunub.

Yanğın zamanı xəsarət alan olmayıb.

Faktla bağlı araşdırma aparılır.