Ələt-Astara-İran İslam Respublikası ilə dövlət sərhədi avtomobil yolunun 72-ci kilometrliyində, Mil-Muğan kollektorunun üzərində yerləşən və qəzalı vəziyyətə düşmüş avtomobil körpüsündə aparılan təmir işləri yekunlaşıb.

"Azəryolservis" ASC-dən Axar.az-a verilən məlumata görə, bu gündən etibarən körpü üzərində tam olaraq nəqliyyat vasitələrinin hərəkəti bərpa edilib.

Körpü üzərində nəqliyyat vasitələrinin intensivliyi nəzərə alınaraq Nəqliyyat Nazirliyi "Azəryolservis" ASC tərəfindən təmir-tikinti işlərinin keyfiyyətlə və vaxtında yekunlaşdırılması üçün əraziyə lazımi sayda canlı qüvvə və texnika cəlb edilmişdi. Körpüdə aparılmış təmir-tikinti işləri zamanı normadan artıq yüklənmiş ağır tonnajlı maşınların intensiv hərəkəti nəticəsində sınmış 4 ədəd dəmir-beton tirlər dəyişdirilib. Qəza baş vermiş hərəkət zolağı boyunca 90 metrlik aşırım tirləri üzərində dəmir-beton karkas yığılaraq üstü betonlanıb.

Xatırladaq ki, 1991-ci ildə inşa olunmuş, uzunluğu 90, eni 18 metr və 5 aşırımdan ibarət körpü bu ilin may ayının 28-də qəzalı vəziyyətə düşmüşdü. Bakı şəhəri istiqamətində hərəkət edən normadan artıq yüklənmiş daha bir ağır tonnajlı maşının keçməsindən sonra körpünün 2-ci və 3-cü aşırımlarının 4 aşırım tirində sınma baş vermişdi. Nəticədə həmin hərəkət zolağı ilə nəqliyyat vasitələrinin hərəkəti dayandırılmışdı.