Masallı rayonunda böyük bir layihənin icrasına start verilib. Rayonda park-bulvar salınır. Yeni layihə Viləş çayının sahilində inşa edilir. Hazırda layihə üzrə bəndvurma işləri həyata keçirilir.

Axar.az-a verilən məlumata görə, park ilkin mərhələdə 7 hektar ərazini əhatə edəcək və 1,5 km uzunluğunda olacaq. Sonrakı mərhələdə parkın uzunluğu 5 kilometrə qədər uzadılacaq. Park-bulavrda bir sıra obyektlər inşa ediləcək. Burda uşaq əyləncə mərkəzi, mini futbol və voleybol meydançaları salınacaq.

Parkın bir hissəsində qədim Masallını özündə əks etdirən guşə də olacaq. Bulvarı bölüb keçən Viləşçayın üzərində piyadaların keçidi üçün 3 körpü də inşa ediləcək. Suyun artırılıb-azaldılması üçün də qurğular yerləşdiriləcək. İnsanlar park ərazisində qayıqla gəzintiyə də çıxa biləcəklər. Masallının simasını dəyişəcək park-bulvarın 2016-cı ilin sonunda istifadəyə veriləcəyi bildirilir.