Azəriqaz İstehsalat Birliyi tərəfindən vaxtaşırı olaraq qazın keyfiyyət göstəriciləri yoxlanılır. Bu gün satılan qazın keyfiyyət göstəriciləri meyarlara tam uyğundur.

Axar.az xəbər verir ki, bunu Azəriqaz İstehsalat Birliyinin Baş direktoru Ruslan Əliyev deyib.

Onun sözlərinə görə, qazın keyfiyyətinin dəyişdirilməsi, hər hansı kənar müdaxilə mümkün deyil:

“Yalnız qazın tərkibinə “adalant” deyilən maddə vurulur ki, bu da sıxma zamanı qazın iyinin müəyyən edilməsi üçündür. Qazın tərkibinə hava vurulması kimi fikirlər yayılır. Havanın təzyiq altında olan hər hansı qaz kəmərinə vurulması mümkün deyil. Bu, ancaq kipliyi yoxlamaq üçün edilə bilər. Yaxud havanın kəskin dəyişməsi zamanı kəmərlərdə maye toplanması əmələ gəlir. Mayeni kəmərdən çıxarmaq üçün yüksək təzyiqli hava vurulur. Hava qazla birlikdə üfürülür. İstisna hallarda ola bilər ki, mətbəxdə olan qaz avadanlıqlarında hava yığılması müşahidə olunsun. Bu hava gələndə açıq qoyun və sayğaca baxın. Sayğac göstəricisi dəyişmir. Fasiləsiz qaz verilən kəmərdə hava gəlməsi mümkünsüzdür. Yalnız təmirdən sonra kəmərdə hava qala bilər ki, onu da binaların girişində olan qaz paylayıcı şkaflarda hava təmizləyici vasitəsilə buraxırıq. Mənzillərdə qaz borusundan havanı çıxarmaq mümkün deyil. Hava mütləq mətbəxdəki qaz avadanlığından çıxmalıdır”.