Milli Məclisin Mədəniyyət Komitəsinin sədri Qənirə Paşayeva Türk Dili və Ədəbiyyatı Dərnəyinin (TDƏD) rəhbər təmsilçiləri ilə görüşüb.

Axar.az xəbər verir ki, TDƏD başqan müavini Üzeyir İlbak, TDƏD Ərzurum şöbə başqanı Murad Ərdaş, TDƏD Ərzurum şöbəsi idarə heyətinin üzvləri – Murad Güvən, Ərdal Barın, Kürşad Əli Kaplan, Nihat Kılıçoğulları, Adəm Qaramanla Mədəniyyət Komitəsində baş tutan görüşdə vətəndaş cəmiyyəti institutları arasında əlaqələrin gücləndirilməsinin vacibliyinə vurğu edilib. TDƏD təmsilçiləri qurumun məramı-məqsədi, həyata keçirdiyi layihələr, planlar və Azərbaycanla əlaqələrin gücləndirilməsi istəkləri barədə danışıb.

Komitə sədri qardaş ölkənin aydınları ilə görüşdən şad olduğunu bildirərək, mədəniyyət, ədəbiyyat və sənətlə bağlı layihələrin, nəşrlərin günün tələbləri səviyyəsində daha da inkişafının məqsədəuyğun olduğunu deyib:

“Sizin önümüzdəki illərdə həyata keçirməyi düşündüyünüz fəaliyyətlər təqdirəlayiqdir. Çox şadam ki, bizim respublika ilə, uyğunprofilli qurumlarla əməkdaşlığın gücləndirilməsi də planlarınıza daxildir. Planlaşdırdığınız uluslararası toplantı, konfrans, simpozium, panel və konqreslərin mövzusunun müəyyənləşməsində, təşkilində Azərbaycandan olan həmkar qurumlarla əməkdaşlığınız ümumi işin xeyrinə olar. Bu sırada, hər cür bilgi, bəlgə və nəşrləri əhatə edən “Türk dili və ədəbiyyatı kitabxanası” qurmaq, hər türkün zövqlə oxuyacağı 100 kitabdan ibarət bir “ailə kitablığı” yaratmaq fikriniz diqqətəlayiqdir. Ümid edirəm, bu nəcib işləriniz başarı ilə həyata keçəcək”.

Komitə sədri qonaqlara Natəvanın, Şəhriyarın portretlərini, kitablar, habelə Xarıbülbül və Qarabağ motivli xatirə hədiyyələri bağışlayıb.

Görüşdə millət vəkili İlham Məmmədov da iştirak edib.