Dünən mənim doğum günü idi. O, mənim doğum günümə əbədi hədiyyə qoyub getdi.

Axar.az xəbər verir ki, bu sözləri Tağı Əhmədovun həyat yoldaşı Salatın Əhmədova Oxu.az-a açıqlamasında deyib.

Onun sözlərinə görə, oktyabrın 18-i T.Əhmədovun xəstəliyinin 4 ili idi:

"İnsanıq. Bütün hadisələr insanın başına gəlir. Heç kəs heç nədən sığortalanmayıb, bilinmir 5 dəqiqədən sonra nə olacaq, sabah nə baş verəcək. Getdi, bir daha qayıtmaz".

S.Əhmədova bildirib ki, Tağı Əhmədov uşaq ürəyinə sahib biri olub:

"Çox gözəl insan idi. Onu kobud, qaba adlandırırlar, amma onun ürəyi uşaq ürəyi kimi idi. Nə bilim. İncisə də, tez barışardı. Ailədə mehriban idi. Özü o cür xəstə idi, ancaq mənimlə maraqlanırdı. Səhhətimdə yaranan problemi soruşurdu".

Qeyd edək ki, Tağı Əhmədov oktyabrın 18-i axşam saatlarında 75 yaşında vəfat edib.