Azərbaycan Yerüstü Nəqliyyat Agentliyi (AYNA) Ukrayna dairəsində nəqliyyat sıxlığının yaranması ilə bağlı məsələyə münasibət bildirib.

Qurumdan Axar.az-a verilən məlumata görə, Ukrayna dairəsində yol hərəkətinin təkmilləşdirilməsi məqsədilə hazırlanan layihənin planlanması da simulyasiya nəticələrinə əsaslanmaqla icra edilir. Hazırda dairənin standartlara uyğun olmaması ərazidə bir sıra nəqliyyat problemləri yaradır.

Bildirilib ki, dairədə tıxac hallarından daha çox təhlükəsizlik səviyyəsinin aşağı olması ilə bağlı hallar olur:

"Qeyd edək ki, ötən gün ərazidə heç bir sıxlıq (? - red.) müşahidə edilməyib. Daha əvvəl yaranan sıxlıq isə təmir işlərinin başlanması ilə əlaqədar idi.

Bundan başqa, layihə çərçivəsində təhlükəsizliyin təmin edilməsi məqsədilə hərəkətin kanallaşdırılması nəzərdə tutulur".

Qeyd edək ki, həm ötən gün, həm də srağagün Ukrayna dairəsində dəhşətli tıxac yaşanıb. AYNA-nın "təkmilləşmə" saydığı işlərdən öncə isə orda heç vaxt tıxac olmayıb.