Naxçıvan Muxtar Respublikasının Ordubad şəhərində yerləşən "Sərşəhər Məscidi" tarix-memarlıq abidəsinin bərpasına başlanılır.

Axar.az Trend-ə istinadən xəbər verir ki, məscidlə yanaşı, Sərşəhər meydanına giriş baş tağlarının bərpası və meydanın abadlaşdırılması işləri həyata keçiriləcək.

Artıq bununla bağlı Naxçıvan Muxtar Respublikası Mədəniyyət Nazirliyində müvafiq işlərə yekun vurulub.

Nazirlik sözügedən işlərin icrasını “Storm Building” Məhdud Məsuliyyətli Cəmiyyətinə (MMC) həvalə edib və müqavilə bağlayıb.

Müqaviləyə əsasən, şirkətə 69,7 min manat ödənilib.

Qeyd edək ki, Sərşəhər məscidi XVIII əsrə aiddir. İkimərtəbəli məscidin mehrabı, ağac sütunları, şəbəkəli pəncərələri və meydanı var. 1986-cı ildə bərpa və təmir edilib, meydan kompleksi şəklinə salınıb. Məscid Nazirlər Kabinetinin 2 avqust 2001-ci tarixli qərarı ilə yerli əhəmiyyətli daşınmaz tarix və mədəniyyət abidələrinin siyahısına salınıb.

Əlavə edək ki, tarix-memarlıq abidəsində bərpa və abadlaşdırma işləri aparacaq Storm Building MMC 2016-cı ildə dövlət qeydiyyatına alınıb. Nizamnamə kapitalı 100 manat olan şirkətin qanuni təmsilçisi Anar Cahangir oğlu Əsgərovdur.