Bakı şəhəri, Yasamal rayonunda yol-nəqliyyat hadisəsi baş verib.

Axar.az Oxu.az-a istinadən xəbər verir ki, Yasamal rayonu, Mirəli Seyidov küçəsi ilə hərəkətdə olan Bakı Bus MMC-yə məxsus 10 nömrəli marşrut xəttinin avtobusu Qəzənfər Musabəyov parkının yaxınlığından keçərkən ağaca çırpılıb.

Hadisə ilə bağlı açıqlama verən Bakı Bus MMC-nin mətbuat katibi Əsmər Əliyeva bildirib ki, avtobusun ağaca çırpılmasına səbəb ehtiyatsızlıq olub:

“Bu gün saat 7:10-da Bakı Bus MMC-nin balansında olan 10 nömrəli marşrut xətti üzrə hərəkət edən 77 JA 658 dövlət qeydiyyat nişanlı avtobus Nazim Hikmət küçəsi, 73 ünvanında (Mirəli Seyidov küçəsi ilə kəsişmədə) hərəkətdə olarkən yol kənarındakı ağaca çırpılıb. Nəticədə ağac qırılaraq dayanacaqda dayanan 90 TE 377 dövlət qeydiyyat nişanlı avtomobilin üzərinə aşıb.

İlkin məlumata əsasən, nəqliyyat vasitəsinin sürücüsü Şəhriyar Məcidzadə ehtiyatsızlıq səbəbindən idarəetməni itirib və nəticədə avtobus yoldan çıxaraq ağaca çırpılıb. Hadisə nəticəsində avtobusda olan 3 sərnişin yüngül xəsarət alıb və dərhal təcili tibbi yardım avtomobilinin vasitəsilə 1 saylı Klinik Xəstəxanaya aparılaraq ilkin tibbi müdaxilə edilib, hazırda onların vəziyyəti normaldır. Hadisə ilə bağlı aidiyyəti qurumlara məlumat verilib və hazırda araşdırma aparılır”.