Qafqaz Müsəlmanları İdarəsinin (QMİ) sədri, Şeyxülislam Allahşükür Paşazadə builki Ramazan ayının fitrə zəkatı ilə bağlı çağırış edib.

Axar.az Teleqraf-a istinadla xəbər verir ki, o, orucun mühüm əməllərindən biri olan fitrə zəkatının Ramazan ayının son günü - bayram axşamı şam namazından sonra verilməli olduğunu bildirib.

"Qazılar Şurasının fitvasına görə, adambaşına 10-15 manat fitrə zəkatının verilməsi tövsiyə olunur. Fitrə canın sədəqəsidir və imkanı olan müsəlmanın ailəsinin hər bir üzvü üçün fitrə zəkatı çıxarması, imkansızlara, ehtiyacı olan ailələrə verməsi vacibdir. Bu, hər bir ailəyə bayram ovqatı yaşamağa imkan yaradır", - QMİ sədri vurğulayıb.

A.Paşazadə qeyd edib ki, Azərbaycan Milli Elmlər Akademiyası Şamaxı Astrofizika Rəsədxanasının verdiyi məlumata görə, bu il şəvval ayının 1-i - Ramazan bayramı miladi təqvimlə martın 30-na təsadüf edir.

Qeyd edək ki, Ramazan ayı martın 1-də başlayıb. Nazirlər Kabinetinin müvafiq qərarına əsasən, martın 30-u və 31-i Azərbaycanda Ramazan bayramıdır.