Hər hansı bir tikilinin sahəsi artırılıbsa, bu halda qaydalara uyğun olaraq həmin şəxsin artırması da nəzərə alınmaqla kompensasiya ödənişləri müəyyən edilməlidir. Çünki sökən qurum da, dövlət də bilir ki, bu artırma sahələri özbaşına tikili hesab olunsa da, əslində, müəyyən razılaşmalar əsasında inşa edilib.

Bu sözləri Axar.az-a açıqlamasında əmlak məsələləri üzrə ekspert Ramil Osmanlı söküntü zamanı tikililərə edilən artırmalara görə kompensasiya barədə danışarkən deyib.

Ekspertin sözlərinə görə, yaşayış yerinin yerləşdiyi ərazi də vacib amildir və dövlət bu istiqamətdə müəyyən siyasət həyata keçirir:

“Dövlət tərəfindən həyata keçirilən proseslərdə mütləq qaydada müstəqil qiymətləndirici cəlb olunur və fərdi qaydada bu ərazilərə baxılır və müvafiq bazar qiyməti müəyyən edilir. Qaydalar bunu tələb edir. Özəl şirkətlər isə bir çox hallarda qiymətləndirici cəlb etmədən, qarşılıqlı razılaşmalar əsasında sakinlərlə prosesi həll etməyə çalışırlar. Ona görə də konkret olaraq hansı halda nə qiymət müəyyən ediləcəyini əvvəlcədən söyləmək düzgün olmaz”.