09:13

Cəlilabad sakini, 1988-ci il təvəllüdlü Bəhruz Ədalət oğlu Hüseynovu qətlə yetirməkdə şübhəli bilinən şəxs saxlanılıb.

Axar.az xəbər verir ki, həmin cinayət əməlini törətməkdə şübhəli bilinən 2006-cı il təvəllüdlü Orxan Əkbərov polis əməkdaşları tərəfindən keçirilən tədbirlərlə saxlanılıb.

Qeyd edək ki, hadisə ötən gün Cəlilabad şəhərinin Səttərxan küçəsində qeydə alınıb.

B.Hüseynov ürəyindən bıçaq xəsarəti alıb.

Yaralı rayon mərkəzi xəstəxanasına aparılsa da, onun həyatını xilas etmək mümkün olmayıb.

Araşdırma aparılır.

***

Mayın 29-da axşam saatlarında Cəlilabad şəhərinin Səttərxan küçəsində ağır cinayət hadisəsi baş verib.

Teleqraf-ın məlumatına görə, 36 yaşlı Bəhruz Ədalət oğlu Hüseynov yaşadığı evdə hücuma məruz qalıb.

Ailəsindən bildirildiyinə görə, Bəhruz Hüseynov işdən evə döndükdən sonra hamam tərəfdən səs eşidib. Evdə bacısı qızının da olması səbəbindən hər hansı narahatlıq hiss etməyən Bəhruz qapını açanda içəridə yad bir şəxsi – Göytəpə şəhər sakini 2006-cı il təvəllüdlü Orxan Əkbərovu görüb.

Gözlənilməz qarşılaşma mübahisəyə çevrilib, Orxan Əkbərov üzərində gəzdirdiyi bıçaqla ev sahibinin sinə nahiyəsinə zərbə endirib.

Mərhumun həyat yoldaşı müdaxilə edərək ikinci zərbənin qarşısını alıb. Yaralı dərhal Cəlilabad Rayon Mərkəzi Xəstəxanasına çatdırılıb, həkimlərin səyləri nəticə verməyib və o, aldığı xəsarətlərdən dünyasını dəyişib.

Cinayəti törətməkdə şübhəli bilinən 18 yaşlı Orxan Əkbərov hadisə yerindən qaçaraq gizlənib.

Hüquq-mühafizə orqanlarının keçirdiyi operativ əməliyyat nəticəsində o saxlanılıb. Faktla bağlı cinayət işi açılıb, istintaq tədbirləri davam etdirilir.

Məlumat üçün bildirək ki, Bəhruz Hüseynov avtomobil təmiri sahəsində çalışırdı. Ailəliydi, iki övlad atası idi.