Sığorta agenti fəaliyyətinə verilən bəzi müddətsiz lisenziyalar ləğv edilib.

Axar.az-ın Dövlət Sığorta Nəzarəti Xidmətinə (DSNX) istinadən verdiyi xəbərə görə, Maliyyə Nazirliyi sığorta agenti kimi fəaliyyət göstərən 71 fiziki şəxsin lisenziyasının ləğvinə dair qərar qəbul edib.

Məlumatda bildirilib ki, sığorta nəzarəti orqanına qanunla müəyyən olunan formada hesabat təqdim etmədiklərinə görə Maliyyə Nazirliyinin müvafiq əmri ilə 80 nəfər fiziki şəxsə sığorta agenti fəaliyyətinə verilən lisenziyaların qüvvəsi bu il aprelin 7-dən 3 ay müddətinə dayandırılıb.

Lakin həmin 80 nəfər fiziki şəxsdən 71-nin tələb olunan hesabatları müəyyən edilən müddətdə təqdim etməmələri və bununla da lisenziyanın qüvvəsinin dayandırılmasına əsas verən halın aradan qaldırmadıqları nəzərə alınaraq, həmin şəxslərə sığorta agenti fəaliyyətinə verilən müddətsiz lisenziyalar Maliyyə Nazirliyinin müvafiq əmri ilə iyulun 24-dən ləğv edilib.