Azərbaycan Respublikasının Mədəniyyət və Turizm Nazirliyi və ölkə nəşriyyatlarının nümayəndələri Türkiyə Respublikasının İstanbul şəhərində keçiriləcək beynəlxalq kitab sərgisində iştirak edəcəklər.

Axar.az xəbər verir ki, nazirlik hər il olduğu kimi bu il də sərgidə xüsusi ekspozisiya ilə təmsil olunur. Cari ildə də nazirliyin iştirakı ilə əlaqədar olaraq 50 kv.m. sahə icarəyə götürülüb.

Tədbirdə ölkəmizin zəngin mədəniyyətinin, inkişaf edən nəşriyyat-poliqrafiya sahəsinin, kitab sənətinin təmsil və təbliğ olunması məqsədilə Mədəniyyət və Turizm Nazirliyinin təşkilatçılığı ilə nümayəndə heyəti iştirak edəcək. Sərgi günlərində nazirlik tərəfindən nəşr edilən kitabların təqdimatı və imza mərasimlərinin keçirilməsi də planlaşdırılır.

Xatırladaq ki, İstanbulda keçiriləcək beynəlxalq kitab sərgisi noyabrın 7-dən 15-nə qədər davam edəcək. 34 il müddətdə uğurla fəaliyyət göstərən sərgidə Avropanın ən böyük ölkələrinin dövlət və özəl nəşriyyatları ilə yanaşı Amerika, Kanada, Yaponiya, Çin, Koreya, Səudiyyə Ərəbistanı, Hindistan və s.-dən 500-ə yaxın təşkilat iştirak edir.