Avtomobilin normadan artıq yanacaq sərf etməsi çoxlarını narahat edən məsələlərdən biridir.

Avtomobil mütəxəssisi Şahin Qasımov avtomobilin hansı səbəbdən normadan daha çox yanacaq sərf etməsi ilə bağlı Axar.az-a danışıb.

5 müxtəlif səbəb

Avtomobilin normadan daha çox benzin sərfiyyatının hansı səbəbdən yaranmasına adətən standart cavablar verilir. Məsələn, orta sürət, təkərlərin hava təzyiqi, əlavə komfort yüklənməsi, kondisioner, işıqlar, şüşələrin açıq saxlanılması, əlavə kütlə və s. Avtomobil mütəxəssisi tərəfindən aparılan araşdırmaların sayəsində bu məsələnin 5 müxtəlif səbəbdən irəli gəldiyi aydın olub. Məhz Azərbaycanda mövcud olan avtomobillərdə də benzin sərfiyyatının artması əsasən 5 səbəbdən yaranır.

Periodik xidmət hissələri

Düzgün seçilməyən və dəyişilmə vaxtı gecikdirilən periodik xidmət hissələri bu problemi yaradan səbəblərdən biridir. Həmin xidmət hissələrinə yağları və fitrləri misal göstərmək olar. Bu isə yanacaq sərfiyyatının artmasında 3-5 faiz arası rol oynayır.

Köhnəlmiş mexaniki hissələr

Köhnəlmiş mexaniki hissələr yanacaq sərfiyyatının miqdarını artıran və ən çox yayılan amillərdən hesab olunur. Belə ki, bəzi insanlar qiymətinin ucuz olduğuna görə yürüşü yarım milyona çatmış avtomobil alır. Bu qədər yürüşü olan bir avtomobilin isə bütün hərəkət hissələri yeyilmiş halda olur. Nəticədə güc itkisi əmələ gəlir. Bu itkini bərpa etmək üçün isə mühərrik daha gərgin rejimdə çalışır və avtomatik olaraq yanacaq normadan daha artıq sərf olunur.

"İnjektor" sistemi

Püskürtmə və yanacaq sistemi... Hamının "injektor" kimi tanıdığı bu sistemin sıradan çıxması yaxud iş prinsipinin pozulması və bundan əlavə yanacaq sistemində olan problemlər avtomobilin daha çox yanacaq sərf etməsi ilə nəticələnir.

"Datçik"lər və elektronik hissələr

Mühərrik sensorları (datçik) və digər elektronik hissələrin nasazlığı da yanacağın çox işlənməsinə səbəb olur. Mühərrik işə düşür, avtomobil hərəkət edir və kompüter diaqnostikası hər hansı problem olduğunu göstərmirsə, bu, tam olaraq avtomobildə hər şeyin qaydasında olduğu anlamına gəlmir. "Datçik" və digər elektronik hissələri adətən müəyyən vaxtdan bir test edirlər. Alınan cavablar müxtəlif və standarta uyğun gəlmədiyi halda avtomobil normadan artıq yanacaq sərf edəcək.

Katalizator və "lamda" sensoru

Qiyməti ucuz olduğuna görə Azərbaycana gətirilən və ölkə bazarına salınan avtomobillərin əksəriyyətində yürüş çox olduğuna görə katalizator xarab vəziyyətdə olur. Mühərrik "boğulduğuna" görə bəzi ustalar avtomobil sahibinə bunu söküb atmağı məsləhət görür. Onların "mənasız şeydir" deyib çıxarıb atdıqları katalizatorun olmaması nəticəsində avtomobilin zəhərli qaz tullantılarına nəzarət sistemi pozulur. Məhz bu səbəbdən mühərrik daha çox yanacaq sərf edir. Analoji hal "lamda" sensoru xarab olanda da baş verir.

Yanacaq sərfiyyatının normadan artıq olmaması üçün sürücülərə ili köhnə, yürüşü çox olan avtomobil almamalarını tövsiyə edirəm. Bundan əlavə, avtomobil sahibi periodik baxış hissələrini zamanında dəyişməli, filtr və yağ seçimini düzgün etməlidir. Katalizator sistemi xarab olduğu halda isə mütləq yenisi ilə əvəzlənməlidir. Onun içini boşaltmaq və katalizatorun yerinə boş qazan qoymaq heç bir halda müsbət nəticə verməyəcək. Ümumilikdə hər bir avtomobildə mühərrik, sensorlar 6 aydan bir yoxlanmalı və yanacaq sistemi təmiz saxlanılmalıdır. Bunun üçün mütəmadi olaraq xüsusi qatqılardan da istifadə etmək olar.