Bu gün DÇ-2014-ün növbəti oyunu keçiriləcək.

Axar.az xəbər verir ki, mundialın ikinci günü A qrupunda yer alan Meksika Kamerun yığması ilə üz-üzə gələcək. Görüş Braziliya vaxtı ilə 13:00-da (Bakı vaxtı ilə 21:00) başlayacaq.

Eyni zamanda B qrupunun oyunları da bu gecə baş tutacaq. Gecə saatlarında futbol azarkeşləri İspaniya – Hollandiya (00:00) və Çili – Avstraliya (03:00) milli komandalarının qarşılaşmalarını izləyə biləcək.

Komanda dəyəri 617 milyon avro olan İspaniya – 199,8 milyon avro dəyəri olan Hollandiya yığması ilə qarşılaşacaq. Bu komandalar indiyədək 4 dəfə qarşılaşıb. 3 oyunda İspaniya, 1 oyunda Hollandiya meydanı qalib tərk edib.

Xatırladaq ki, bu komandalar sonuncu dəfə ötən Dünya kubokunun finalında qarşılaşıb. Andres İnyestanın vurduğu yeganə qolla İspaniya Hollandiyaya qalib gələrək Dünya kubokunu qazanmışdı. Bu baxımdan bu komandaların oyunu böyük maraq doğurur.

Oyunu italiyalı hakim Nikola Rizzoli idarə edəcək.