İrəvan Azərbaycanın Konstitusiyasında Ermənistana qarşı ərazi iddiaları məsələsini qaldırmır, buna görə də bu mövzuda anlayış mövcuddur.

Axar.az Bakupost.az-a istinadla xəbər verir ki, bunu “Sputnik Ermənistan”a açıqlamasında Topçubaşov Mərkəzinin direktor müavini Murad Muradov bildirib.

Muradovun sözlərinə görə, Azərbaycan XİN artıq uzun müddətdir açıq şəkildə bəyan edib ki, sülh müqaviləsinin imzalanması Ermənistan Konstitusiyasına dəyişiklik edilməsindən, yəni “Azərbaycanın ərazi bütövlüyünə potensial iddialara” dair istinadların aradan qaldırılmasından asılıdır.

“Allah qoysa, yaxın vaxtlarda bu, həyata keçiriləcək. O zaman tam hüquqlu sülh müqaviləsinin imzalanmasına və diplomatik münasibətlərin qurulmasına heç bir maneə qalmayacaq”, – deyə ekspert bildirib.

Xüsusilə, o qeyd edib ki, söhbət Ermənistan Respublikasının Müstəqillik Bəyannaməsində Qarabağa edilən istinaddan gedir ki, bu da Azərbaycan üçün “həssas məsələ, asta hərəkət edən potensial mina” hesab olunur.

Azərbaycan Konstitusiyasında Ermənistan tərəfi üçün mübahisəli məsələlərin olub-olmaması ilə bağlı suala cavabında Muradov bildirib ki, Əsas Qanunda “Ermənistana qarşı birbaşa ərazi iddiaları yoxdur”.

“Vaşinqtonda ölkələrin müqaviləni paraflaması onu göstərir ki, bu məsələ ilə bağlı anlayış var. Azərbaycanın Konstitusiyası mövzusu isə İrəvan tərəfindən qaldırılmır”, – deyə o, əlavə edib.

Ekspert bir il ərzində sülh sazişinin imzalana biləcəyini istisna etməyib.

Erməni KİV-in Bakıda həbsdə olan separatçılarla bağlı sualına gəlincə, Muradov bildirib ki, onun bu mövzuda danışmağa səlahiyyəti yoxdur.

Qeyd edək ki, bundan əvvəl Ermənistanın baş naziri Nikol Paşinyan bəyan etmişdi ki, İrəvanın Azərbaycanın Konstitusiyası ilə bağlı narahatlığı var, çünki orada Ermənistana qarşı ərazi iddiaları mövcuddur. Lakin Ermənistan tərəfi bu məsələni qaldırmayıb.

Azərbaycan hakimiyyəti dəfələrlə bəyan edib ki, Ermənistan Konstitusiyasından Qarabağa dair bəndin yer aldığı Müstəqillik Bəyannaməsinə istinad çıxarıldıqdan sonra İrəvanla sülh müqaviləsi imzalamağa hazırdır.