Rövşən Lənkəranskini ən yaxın adamı və killerinin öldürdüyü barədə növbəti iddia irəli sürülb.

Axar.az Lent.az-a istinadla xəbər verir ki, Türkiyə mediası Rövşən Lənkəranskinin sağ əli Hacı Beyləqanskinin qətllə bağlı şübhəli hərəkətlərini bir daha gündəmə gətirib. Özəl mənbələrin məlumatı əsasında yayılan xəbərdə bildirilib ki, kriminal aləmdə Hacı Beyləqanski ləqəbi ilə tanınan Hacıbaba Talıbxanlı Rövşənin yerinə keçmək üçün ona sui-qəsd təşkil edib.

İddiaya görə, Rövşənin Beşiktaşdakı oteldə iştirak etdiyi toplantını məhz Hacı Beyləqanski təşkil edibmiş, hətta şübhə yaratmamaq üçün silahlı şəxslərə atəş də açıbmış. Lakin istintaq nəticəsində həqiqət ortaya çıxıb.

Kamera görüntülərindən bəlli olub ki, Hacı Beyləqanski sui-qəsdçilərə atəş açsa da, onların heç birini vurmayıb. Bu isə polisi şübhələndirib. Rusiyada 5, Azərbaycanda isə 1 cinayətə görə axtarışda olan kriminal avtoritetin Rövşəni öldürən killerləri isə Qırğızıstana qaçıb.

Hacı Beyləqanskinin adı Rövşən Lənkəranskinin sifarişi ilə bir neçə səs-küylü qətl törətməkdə hallanıb.

Xatırladaq ki, Rövşən Canıyevin (Rövşən Lənkəranski) qətlində şübhəli bilinən 4 nəfər - Tahir C., Hacıbaba.T. (Hacı Beyləqanski), Zaur İ. və Vahid M. şübhəli qismində saxlanılıb.

Məhkəməyə göndərilən işin istintaqı zamanı bəzi məqamlar üzə çıxmışdı və media ilk dəfə onda Hacı Beylənqaskinin adını Lənkəranskinin qətlində əsas fiqur kimi hallandırmışdı. Polisin məlumatına görə, 2013-cü il avqustun 18-də Başakşehirdə öldürülən Əlibaba Həmidovun ("Qoca" ləqəbli azərbaycanlı avtoritet) qətli ilə bağlı Rövşən Lənkəranski və Hacı Beyləqanski İstanbul polisi tərəfindən axtarılırmış.